E calor extremo aki lo continua pa algun dia mas pa cual Departamento di Salud Publico (DVG) ta conseha comunidad con pa cuida nan salud pa supera e dianan aki. No ta posibel pa combati e fenomeno di naturalesa aki pero si por tuma accion pa proteha nos mes y otronan contra di e calor extremo.
Un ola di calor tin su efecto riba hende y bestia. Riba hende e tin efecto specialmente riba e personanan cu un enfermedad cronico manera, diabetes, presion halto, cancer, asma, pero tambe esnan cu nan trabou ta fisicamente pisa y pafo. Otro grupo di riesgo ta hende grandi, baby, mucha chikito, hende cu sobre peso y obesidad. Calor por ocasiona deshidratacion, zonnesteek, presion halto, dolor di cabes, cansancio, biramento di cabes y stoma, sacamento, cram di musculo y hasta ataca cerca un persona cu ta den e temperatura halto pa un tempo largo.
Departamento di Salud Publico ta conseha comunidad pa durante e dianan cu ta sigui pa bebe por lo menos 2 liter di awa pa dia, uza protector solar SPF 30 of mas, bisti bril di solo, pechi of sombre, paña di color cla preferibel di catuna of linen y evita bebida cayente y bebida cu ta contene cafeina of hopi sucu durante e oranan mas calor cu ta entre 11:00 di mainta pa 2:00 di atardi.
Nos muchanan, enfermonan y nos hende grandinan ta esnan mas vulnerabel pa e calor aki.
Ta hopi importante pa vigila nan continuamente y refresca nan curpa pa wanta e temperatura abao y hidrata cu suficiente likido pa evita un posibel heatstroke, cu ta un condicion hopi delicado caminda cu e curpa ta stop di soda.
Sintomanan di un heatstroke ta:
- Temperatura corporal halto den corto tempo;
- cara y cuero cora y seco;
- no ta soda mas;
- curason ta bati duro;
- dolor di cabes;
- confusion y por cay flow;
- sacamento of diarea.
Kico pa haci den caso di un heatstroke?
- Busca asistencia medico mesora yama 911;
- tene e persona trankil y den fresco;
- los e pañanan di su curpa;
- fria e curpa cu un serbete/paña muha (cu awa friu of di cranchi);
- por pone ijs of icepack bou di brasa, na nek, lomba, riba stoma y/of memey di e pianan;
- si persona ta consciente lag’e bebe awa no mucho friu.
Share this page