Esaki lo ta habri henter dia pa publico y entrada ta gratis. E grupo ta presenta obranan den color principal geel. Na tur tin 17 participante. Awo, e exposicion ‘Yellow’ ta habri for di dia 20 di september. E coleccion di obra ta diverso den tipo di obra, tin cuadra, potret, arte digital, obra di Mozaiek y assemblage. Un di e participantenan ta Nimia Geerman:
Nimia Geerman ta Pintora, Ilustrador, Muralista y Tattoo artist. Semper artistico y creativo di chikito, un talento cu ela hereda di su tata. Como cu su tata a studia arte, arte tabata algo normal na cas. Su mama ta su ‘Number one fan’ y semper ela sostene y yuda Nimia pa desaroya su talentonan artistico. Nimia su mama tabata warda tur su pinturanan y obranan y a busca semper pa yuda su yiu muher cu material y tools!
Na Colegio Arubano Nimia su vaknan preferi tabata ‘Tekenen’ y ‘Handenarbeid’ semper. Su docentenan cu a yud’e hopi na Colegio Arubano tabata meneer Ciro Abath y meneer Ludwig d’Lisle. Ken no ta corda nan?
Despues Nimia a sigui tayer cu docentenan di Rietveld Academie cu tabata bishita e isla y tambe ela participa na Aruba Art Fair. E ta un amante di Fine Art y ta pinta Murals y Nimia ta wak su mes tambe como auto-didactico, semper experimentando cu diferente media y color briyante.
Un par di aña pasa Nimia a desaroya su mes ‘brand’ cu ta Bhop (Bunny Hop), semper ela gusta e bestia coneu, e bunny. Y esaki ta su imagen preferi te ainda. Bunny Hop ta referi na un tecnica di skating di ‘hop’. “Mi ta cuminsa un cuadra y despues mi ta usa e imahen pa desaroya otro product cu e imahen cu mi a crea. Manera T-shirt, mugs of Kimono”
“Mi proximo proyecto ta un cuadra titula ‘Saffron plega’ pa e exposicion na biblioteca titula ‘Primary colors’. Esaki ta habri diaranson dia 21 di september pa 5or di atardi. Exposicion ta keda habri pa 3 siman. Un y tur ta bon bini durante orario regular di biblioteca na Playa.”
Share this page