RIVM a aproba e plan di ehecucion di vacunacion contra COVID-19 na Aruba y nos ta cla pa ricibi e vacunanan!

ORANJESTAD – Minister di Turismo, Salud Publico Y Deporte Sr. Dangui Oduber ta informa cu RIVM a aproba e plan di ehecucion di vacunacion contra COVID-19 despues di haci tur control necesario na Aruba riba 25 y 26 di januari.

Delegacion Rijksinstituut voor Volksgezondheid en Milieu (RIVM) na ArubaMinister Dangui Oduber y henter Ministerio di Salubridad Publico conhuntamente cu Departamento di Salud (DVG), Bureau Rampenbesttrijding (BRA) y Dient Openbare Werken (DOW) ta preparando di aña pasa pa asina Aruba por ricibi e vacunanan.

Pa varios siman caba Aruba a bin ta trahando riba e strategia y tambe plan di ehecucion di e vacuna. E plan aki ta uno extenso y a wordo traha haciendo uzo di tur informacion y innovacion necesario.

Dia 7 di januari 2021 Minister Dangui Oduber a anuncia cu Aruba su plan di vacunacion ta cla y tambe a anuncia cu RIVM lo ta na Aruba dianan 25 y 26 di januari pa asina aproba e plan di ehecucion y tambe e “cold chain”, di pa locual ta e vacunanan. E ultimo simannan aki ta hopi trabou a ser haci pa un team hopi dinamico. Tur e preparacionannan necesario a ser haci promer cu e yegada di RIVM. Di e forma aki Aruba a ricibi e freezernan, a ricibi e koelernan y a haci e instalacionnan necesario na diferente sitio pa e controlnan di RIVM por a tuma lugar. RIVM a keda impresiona cu e plan di ehecucion di Aruba y a duna “green light” pa Aruba haya e vacunanan.

Plan di vacunacion COVID-19Manera cu a ser anuncia RIVM tawata na Aruba e ultimo 2 dianan y a haci tur control necesario. RIVM a haya un presentacion den extenso di nos plannan, despues nan a revisa y controla e “cold chain”. Tambe RIVM a bishita e localidadnan caminda e vacunacion lo tuma lugar.

Minister Oduber ta sumanente satisfecho cu e reaccion di RIVM. Nan a keda masha impresiona con Aruba a prepara su mes pa e vacunacion contra COVID-19. Esaki ta asina importante pa e salud di e comunidad y sigur ta contribui den e recuperacion di nos turismo y recuperacion di nos economia pa asina Aruba por bolbe bek na normalidad.

Den e proximo dianan nos dilanti lo sigui cu mas informacion riba e plan di vacunacion di Aruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options