Rijksministerraad a aproba pa prolonga nombracion di señor Alfonso Boekhoudt como Gobernador di Aruba pa un termino mas di 6 aña

Periodo di su Excelencia Gobernador señor Alfonso Boekhoudt lo vence dia 1 di januari 2023. Gobierno di Aruba, mirando e experiencia y conocemento di señor Boekhoudt, mirando e respet cu e ta goza di dje den nos comunidad, a pidi su persona pa sigui pa un termino mas. Señor Boekhoudt a acepta e peticion di Gobierno.

Gobierno di Aruba a propone na Hulanda pa prolonga e nombracion di Gobernador Boekhoudt un termino mas, di 2023 pa 1 januari 2029. Awe, diabierna, RMR a aproba e proposicion aki.

Prome Minister Evelyn Wever-Croes den nomber di Gobierno di Aruba ta felicita sr. Boekhoudt cu e nombracion y ta gradici sr. Boekhoudt pa su disponibilidad pa sigui sirbi e comunidad di Reino Hulandes