Reunionnan durante e di 74 Reunion General di Nacionnan Uni

Como parti di Reino Hulandes, Aruba ta forma parti di Nacionnan Uni y a base di esaki ta atende reunionnan aki.

Den e siman cu a pasa, Prome Minister Evelyn Wever-Croes a atende varios reunion riba e tema di Sustainable Development Goals SDG’s, e metanan di Desaroyo Sostenibel.

Ta trata di e 17 metanan cu Nacionnan Uni a stipula pa crea un miho mundo pa 2030. Aruba tambe ta compremeti pa cumpli cu nan. Metanan manera Combati Pobresa y Hamber, Bon Educacion, Awa di calidad pa tur hende, Posicion di Hende Muhe y Oportunidad pa Hende Muhe.

E dos ultimo puntonan Prome Minister a indica cu tawata esunnan di mas importante y a elabora mas hopi riba nan den varios reunion na unda cu a yega na palabracionnan hopi interesante. Nacionnan Uni por yuda Aruba desaroya maneho riba e tereno aki.

E tema di corupcion y bon gobernacion tambe tawata temanan importante di discusion den e reunionnan na Nacionnan Uni incluyendo digitalisacion y e-Government. Banda di varios reunionnan di Nacionnan Uni, Prome Minister a reuni cu World Economic Forum (WEF) y cu e organisacion OECD na unda tambe a toca e temanan menciona y a haci palabracion hopi interesante.

Prome Minister, probechando cu tambe tawata presente varios lider di diferente pais den region na e Asemblea General di Nacionnan Uni, a tuma e oportunidad pa reuni cu varios di nan pa trata e tema di Venezuela. Prome Minister a reuni cu e Embahado di Reino na Washington na unda Prome Minister a ricibi un ‘update’ amplio riba e ultimo desaroyonan.

Tambe e mandatario prinicipal di nos pais a atende un reunion riba tereno ministerial di Caribe cu Under Secretary of State David Hale. Un reunion hopi importante cu a trata tambe den cuadro di Reino.

Finalmente, un otro reunion di Reino atende ta un reunion entre Su Mahestad Willem Alexander y Reina Maxima hunto cu e Prome Ministernan di e 4 pais di Reino Hulandes na unda a trata e relacion di Reino en general y e cooperacion entre e paisnan den Reino.

Riba e potret: Secretario General di Nacionnan Uni, Rey Willem Alexander, Reina Maxima, 4 Premier di Reino, PM Evelyn Wever-Croes di Aruba, PM Leona Marlin Romeo di Sint Maarten, PM Eugene Rhuggenaath di Corsou y PM Mark Rutte di Hulanda. Tambe riba e potret, Minister Blok di Hulanda y Minister Kaag di Hulanda.