Resumen rapport tocante su risico-analisis nacional ariba labamento di placa

ORANJESTAD  - Aruba ta publica resumen di e rapport tocante su risico-analisis nacional ariba labamento di placa.

Introduccion

Final NRA Summary Report - February 2021 (Final approved version)Como miembro di e Financial Action Task Force (FATF) como tambe di e Caribbean Financial Action Task Force (CFATF),  Aruba a compomete su mes totalmente pa cumpli cu e standardnan internacional mas halto cu tin ariba tereno di combatimento di labamento di placa como tambe financiamento di terorismo (AML/CFT).

Rba peticion di e grupo-piloto nacional di AML/CFT cu ta ser presidi pa nos Prome Minister , a tuma luga durante e ultimo lunanan un risico-analisis nacional di labamento di placa, cual a wordo haci di acuerdo cu e recomendacionnan di FATF, como tambe den cuadro di e preparacion pa loke ta trata e proximo evaluacion di parti di CFATF ariba e efectividad di e structura di AMI/CFT- na Aruba.

E risico-anaisis nacional a cuminsa na october 2018 cu participacion di mas di ochenta participante for di sector publico como tambe sector priva. E analisis a dura mas of menos 18 luna. A base di diferente discusion y e resultadonan di e risico-analisis, a traha dos rapport. Uno detaya y uno cu ta contene un resumen (pa e metanan publicitario). E presidente di e grupo-piloto nacional di AML/CFT a aproba tur dos rapport ariba 21 di februari 2021. Den e rapportnan ta tene cuenta cu e esfera economico y geografico di Aruba, e cuadro institucional di Husticia na Aruba como tambe e tendencianan criminal na Aruba. Actualmente ta wordo traha ariba un otro rapport den cual lo incorpora e resultadonan di e risico-analisis di financiamento di terorismo. E espectativa ta cu pronto lo finalisa e rapport aki.

Pa por a traha e risico-analisis nacional a haci uzo di un metodología, como tambe un instrumento desaroya door di Banco Mundial. Cu e modelo di Banco Mundial aki un pais por identifica e impulsadornan mas importante riba tereno di labamento di placa y financiamento di terorismo. E ta consisti di un proceso metodologico cu ta basa rriba e estudio di e relacionnan causal entre e factornan di risico cu por conduci na labamento di placa y e diferente variablenan relaciona cu e esfera legal, institucional y economico.

E modelo ariba menciona di Banco Mundial ta ofrece un balansa entre e uzo di informacion cuantitativo (datonan y estadisticanan) y informacion cualitativo. E modelo aki ta consisti di nuebe modulonan cu ta relaciona cu otro. E modulonan aki ta basa riba variablenan cu ta representa factornan cu ta relaciona cu labamento di placa, financiamento di terorismo, menasanan como tambe diferente vulnerabilidadnan. E “menasanan” tin di haber cu e tamaño y caracteristicanan di e entradanan cu ta wordo genera door di e diferente crimennan den un pais, mientras cu e “vulnerabilidadnan” ta relaciona cu e debilidadnan y hiatonan den e defensa di un pais contra labamento di placa y financiamento di terorismo. Por menciona cu e menasanan y vulnerabilidadnan por ta existi ariba nivel nacional como tambe den diferente sectornan di un país.

E hecho di tin un risico-analisis nacional como tambe un strategia nacional di AML/CFT ta di sumo importancia pa e proximo ronda di evaluacion di Aruba door de CAFT, cual lo tuma lugar den e di tres kwartaal di 2021.

Retonan

Durante e proceso pa traha e risico-analisis a encontra diferente retonan, principalmente e dificultad cu tabatin ora di busca informacion tocante investigacion, persecusion y sentencianan, como tambe e profundidad mes di e informacionnan cu tabata disponibel. Informacionnan specifico y e datonan di e menasanan y vulnerabilidadnan na cualnan e diferente sectornan di un país ta expone na dje, no tabata semper disponibel. E defecto den e disponibilidad di e informacionnan y datonan tabata e consecuencia di e cantidad limita di e casonan di labamento di placa na Aruba.

Pues, fuera cu a identifica e menasanan di labamento di placa a base di e diferente casonan di labamento di placa na Aruba, a identifica tambe menasanan di labamento di placa pa e diferente sectornan na Aruba a base di informacion y datonan obteni for di CBA, MOT como tambe algun otro instancianan relevante. Tambe a haci uzo di información  procedente di asistencia legal mutuo como tambe información ricibi di e representantenan di e diferente sectornan durante e sesionnan di e risico-analisis y e rapportnan tipologico di FATF.

Resultadonan mas importante

E risico-analisis nacional a resulta den un clasificacion di “Medium-High” pa Aruba. Esaki ta parcialmente debi na e posicion geografico di Aruba, su infrastructura excelente y e sectornan financiëro y comercial cu ta bon desaroya.

E crimennan cu a wordo identifica como e menasanan mas importante pa loke ta trata  labamento di placa na Aruba ta entre otro comercio di droga, contrabando di cantidadnan grandi di placa, sobornacion, corupcion como tambe banconan sin licensia cu ta opera den baho mundo.

E debilidad nacional pa loke ta trata labamento di placa ta existi di dos parti: e debilidad sectorial, cu ta wordo determina door di e resultadonan di e manera con e diferente sectornan (priva) a evaluá e debilidadnan, y e capacidad nacional pa combati (e puntonan fuerte y zwak den mecanismo di defensa di Aruba).

E debilidadnan nacional y sectorial di e capacidad pa enfrenta labamento di placa ta mustra ariba e necesidad di entre otro: un maneho y strategia nacional di AML/CFT, leynan di AML/CFT mas estricto, un coleccion mas centralisa y structura di e datonan tocante crimennan, placa genera door di crimennan of corientenan financiero relaciona cu e crimennan ey, controlnan mas severo na fronteranan, instalacion di un autoridad di weganan di azar, introduccion di un registro central di “Ultimate Beneficial Owner” (ultimo propretario beneficia) pa tur entidadnan registra na Aruba, medidanan pa combati corupcion, y por ultimo pero no menos importante, mas personal cualifica pa combati labamento di placa.

A base di e resultadonan (preliminar) di e risico-analisis nacional tin diferente autoridadnan cu a tuma diferente medida pa mitiga un parti di e risiconan pa loke ta concerni labamento di placa cu a wordo identifica.

Accionnan cu lo wordo tuma

Ariba termino corto e gobierno di Aruba lo start cu e diseño di un strategia di AMI/CFT mas extenso pa mitiga e risiconan di labamento di placa cu a wordo identifica den e analisis. Esaki lo tuma luga, den secuencia di prioridad.

E proveedornan di servicio financiero como tambe e proveedornan di servicio no-financiero mester pone un relacion entre e risico-analisis y nan juicio profesional di e risiconan, nan maneho cu ta basa ariba e huicio ey como tambe nan medidanan pa mitiga e risiconan di labamento di placa na cual e sector cu e ta pertenece ta wordo exponí.

Remarkenan final

E Gobierno di Aruba tin e intencion pa ripití e risico-analisis nacional cada 5 aña. Por si acaso por surgi desaroyonan cu por conducí na un risico-analisis mas prome na nivel nacional of na nivel di sector, lo percura pa esaki tuma lugar.

Pa finalisa, Gobierno di Aruba kier a gradici tur e personanan di sector publico como tambe e sector priva cu a participa na e risico-analisis nacional. Tambe un agradicimento na Lisa Bostwick, Molly Silver, Yee Man Yu y Andrea Garzon di Banco Mundial pa a suministra consehonan ariba e aspectonan technico, ariba e uzo di e modelo ariba menciona como tambe pa nan “feedback” ariba e concepto di e rapport. Un palabra di gradicimento special ta bay tambe na Sra. Kiki van de Werf di Banco Central di Aruba y Sra. Sasha Behari di MOT pa e coordinacion di e proceso di e risico-analisis nacional.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options