Resultado y procedura Nationale Doorstroomtoets

Esaki como parti di e maneho nobo pa e procedura di fluho pa scol avansa.

Alumunonan cu ta sali di scol basico y ta continua nan carera escolar na un scol avansa ta ricibi un asina yama ‘schooladvies’ cu ta indica si e carera escolar mester sigui na EPB, SPO, MAVO of HAVO/VWO. Ta duna e conseho di scol aki a base di nan rapportnan y desaroyo durante nan carera escolar na scol basico. Den pasado ta alumnonan cu un ‘schooladvies’ pa HAVO/VWO so tawata haci e asina yama ’ toelatingstoets’ pa por drenta Colegio Arubano of Colegio San Nicolas.

Dia 3 di juni ultimo tur scol basico na Aruba a ricibi e resultado di e Nationale Doorstroomtoets.

Resultado di e Nationale Doorstroomtoets

E promedio pa taal y rekenen pa tur scol hunto ta:

• Taal 6.4
• Rekenen 6.4

Di tur scol afgerond:

• 20% di e alumnonan a score nivel HAVO/VWO
• 40% di e alumnonan a score nivel MAVO
• 40% di e alumnonan a score nivel EPB

Manera stipula, e conseho di scol ta conta banda di e score riba e toets. Den caso cu tin diferencia, ta e nivel cu ta mas halto ta esun cu ta determina cua nivel e alumno por bay.

Den cuadro di mehoracion di e calidad di enseñansa na Aruba, lo analisa e resultado di e toets aki mas profundamente door di Departamento di Enseñansa y Dienst Inspectie van het Onderwijs. Cada directiva di scol y cada scol a haya e resultado pa asina nan tambe por analisa esaki pa mehora e calidad di enseñansa cu nan ta brinda.

Aki ta sigui algun pregunta frecuentemente haci tocante e doorstroomtoets.

Kico ta un Nationale Doorstroomtoets?

• E doorstroomtoets aki ta midi e habilidadnan di un alumno den area di ‘taal ’y ‘rekenen’. Esaki tin como meta pa indica e nivel di enseñansa secundario cu ta pas mas miho cu e alumno;
• E toets aki ta nacional pasobra tur alumno den klas 6 di scol basico ta haci e mesun toets na mesun momento.

Kico ta pasa si e resultado di e doorstroomtoets ta indica un otro nivel di enseñansa secundario cu e schooladvies a duna anteriormente?

• E maneho di pais Aruba ta indica cu e ‘doorstroomtoets’ ta un instrument pa sostene e ‘schooladvies’;
• Den caso cu tin diferencia, ta e nivel mas halto ta esun cu ta determina cua nivel e alumno por bay.