REPSOL no ta sigui cu exploracion pa petroleo of gas den e subsuelo di lama rond di aruba

REPSOL a dicidi pa no drenta e siguiente fase (4) di e contracto cu e tin cu CAP. E contracto firma pa ambos partido na december 2012 a yega su fin 30 november di 2019, despues di un periodo di 7 aña.

E rason principal pa no continua cu e campaña di exploracion ta e resultadonan di e proefboring, Bon Bini-1X, panort di Aruba, cu a resulta den un “dryhole”. Despues di a haci un analisis di tur e informacion obteni di Bon Bini-1X, a corela esaki hunto cu e datonan sismico cu a adkiri na 2014 y 2015. Door di e corelacion aki por a reevalua e prospectonan bieu y kisas haya prospecto nobo den e awanan teritorial di Aruba. Despues di e reevaluacion aki REPSOL y e hecho cu no a logra haya otro partner pa e proyecto di exploracion cu ta hopi costoso, a dicidi pa no sigui explora.

Gobierno di Aruba ta gradici tanto CAP como e compania REPSOL pa tur esfuerso haci e ultimo 7 aña y tambe kier a duna danki na tur e institucionnan, organisacionnan y stakeholders incluyendo e Ministerio di Asunto Economico di Hulanda cu a yuda den un forma of otro pa laga e varios operacion cu a tuma luga bay miho posibel.

Gobierno ta den e fase pa busca conseho riba e decision recien di REPSOL. Den e fase aki, CAP ta hunga un rol crucial.