Regulacion pa Vacation Rentals

Ta importante pa crea y mantene e igualdad den e condicionnan pa opera negoshi y crea e level playing field. Pa varios aña ta hibando e discusion riba e cumplimento cu e doñonan di vacation homes mirando e crecemento di demanda pa vacation rentals. E tendencia cerca turista pa hospeda na un vacation rental ta aumentando den e ultimo añanan rond mundo y na Aruba no ta diferente. Na Aruba 30% di nos bishitante ta keda den acomodacion tipo  "vacation home".

Pa e motibo aki ta hopi importante pa regula e negoshi di vacation rental.  Segun Gobierno mester crea e igualdad den e operacion di tur esnan cu ta huur acomodacion na Aruba. Esaki ta inclui entre otro cumplimento cu impuesto di e vacation rental, ya cu Gobierno kier haya su fair share cu ta entre otro e “Tourism Levy”.

Ya caba tin accion concreto cu a wordo stipula y ta den proceso pa privatisa Dienst Warenkeuring en Hygiene cu ta parti di Departamento di Salud Publico (DVG) y converti esaki den un sui generis pa atende cu e proceso di otorgamento di permiso na e vacation rentals mas eficiente.

Vacation Rentals lo mester tin un permiso di Gobierno pa por opera.

E reunion aki tabata fructifero pa haya e contribucion di ATA, AHATA, Departamento di Impuesto y Banco Central. Awor tin un bista real di e cantidad di vacation rentals na Aruba y cuanto ta cumpliendo cu nan obligacion. Ademas e cantidad ta duna un indicaccion di e cantidad di permiso cu lo mester otorga cu e regulacion nobo. E prome paso lo mester determina kiko ta bira e maneho y kico ta bira e tarifa cu lo mester paga pa e permiso menciona.