Registro obligatorio di ultimo beneficiario di companianan y trusts aproba unanimamente den Parlamento di Aruba

E amienda di ley aki ta relaciona cu introduccion di e obligacion pa e ultimo beneficiario di companianan wordo registra na Camara di Comercio.

Minister di Asuntonan Economico, Comunicacion y Desaroyo Sostenibel, mr. Geoffrey Wever, a contesta e pregunta y preocupacionnan cu a ser treci padilanti door di miembronan di ambos oposicion y coalicion, entre otro riba tereno di privacy di e UBO. Minister Wever a splica cu a tene cuenta cu mayoria recomendacion di Raad van Advies den e concepto di ley cu a entrega na Parlamento na maart ultimo. 

Un ‘ultimate beneficial owner’ of UBO ta e persona (‘natuurlijk persoon’) cu ta e doño berdadero di un empresa. Meta di e registracion aki ta pa logra transparencia den informacion tocante companianan. Autoridadnan financiero mester sa na cada momento y di forma detaya ken ta UBO di un compania. Cu e informacion aki por controla no ta  uza un compania pa crimennan financiero.

Cu introduccion di e ley aki ta sigura cu Aruba ta sigui cumpli cu recomendacionnan di e Financial Action Task Force (FATF), cual ta un instancia internacional cu ta monitorea actividadnan criminal di labamento di placa y financiamento di terorismo y proliferacion.

 “Mundo moderno ta rekeri leynan moderno cu por adapta na e complexidad di cierto materia. Compliance cu exigencianan internacional na e momento aki ta bayendo bon danki na Banco Central di Aruba cu ta hiba un maneho di control estricto. Sinembargo mester keda update nos leynan pa keda cumpli cu normanan internacional y no duna espacio pa crimennan financiero manera labamento di placa, financiamento di terorismo y proliferacion tuma lugar,” minister Wever a indica.

E cambionan adopta lo bin na vigor entrante1 di januari 2022.