Registro di terminacion di relacion laboral riba mercado laboral

Dit item is gearchiveerd op 15-08-2020.

ORANJESTAD – Den cuadro di e crisis di COVID-19, DAO ta desea di colecta mas informacion tocante e terminacion di relacionnan laboral desde 1 di januari 2020 y particularmente di ki forma esakinan a termina.

E pandemia di COVID-19 a crea un gran impacto riba economia y mercadonan laboral rond mundo. Aruba no ta un excepcion den esaki. Medidanan cu a wordo tuma pa controla e virus a ocasiona cu mayoria compania a haña nan mes obliga di pone un paro na (casi) tur actividad economico. Esaki a trece cune cu un gran parti di trahadonan a keda sin trabou.

E situacion aki a crea varios pregunta serca trahadonan como tambe serca dunadonan di trabou. Trahadonan tawata desea informacion tocante nan derechonan laboral, of continuacion di pago di salario y nan dianan di vakantie. Dunadonan di trabou tawata desea informacion con pa baha e cantidad di trahado cual lo reduci gastonan operacional pa asina surpasa e crisis aki.

Durante e temporada di duda y inseguridad aki, Departamento di Labor y Investigacion (DAO) a brinda asistencia na trahadonan y dunadonan di trabou. Riba e website di DAO a comparti informacion riba nos leynan laboral cu ta keda vigente durante e periodo di crisis. Por a mira tambe cu oficinanan di abogado y sindicatonan a expresa nan mes publicamente  riba e topico di relacion laboral entre e trahado y e dunado di trabou.

Un relacion laboral por yega na su fin conforme algun trayecto y motibonan cual ta legalmente regla. Mirando e preguntanan cu DAO a ricibi for di trahadonan y dunadonan di trabou por conclui cu pa un gran parti relaccionnan laboral a termina a base di acuerdo mutuo (areglo di pakete).

Manera menciona, DAO ta desea di colecta mas informacion tocante e terminacion di relacionnan laboral desde 1 di januari 2020 y particularmente di ki forma esakinan a termina.

Pues, DAO ta haci un yamada na tur trahado cu nan relacion laboral a termina desde 1 di januari 2020 pa registra di forma digital. Akibou por encontra e link pa registra.

Informacion di tur persona lo wordo trata cu maximo cautela y ta confidencial.

Click riba e link pa registra. Bo por escoge entre Papiamento, Ingles y Spaño:

Link Papiamento: https://www.surveymonkey.com/r/Pap-DAO

Link English: https://www.surveymonkey.com/r/Eng-DAO

Link Spanish:  https://www.surveymonkey.com/r/Esp_DAO

Si acaso bo persona tin pregunta of no por registra di forma digital por tuma contacto cu Bureau Arbeidsmarktonderzoek via e-mail simon.brete@aruba.gov.aw of dao.arbeidsmarktaruba@gmail.com of por yama riba number di telefon 5237718.

Finalmente, DAO ta informa cu den caso di un conflicto laboral por tuma contacto libremente cu departamento di Conflicto y Retiro via e-mail dao.arbeidsgeschillen@gmail.com of por yama riba number di telefon 5237720 pa un cita.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options