Rector nobo pa Universidad pa Aruba

ORANJESTAD - Diahuebs ultimo dr. Rudy Lampe den su capacidad como minister di Enseñansa, Sciencia y Desaroyo Duradero a cera conoci cu e candidato cu Colegio di Supervision di Universidad di Aruba a scoge pa ta e sucesor di dr. Glenn Thodé, como Rector di e instituto entrante 1 juli 2021.

Herry Koolman y Angelo Brete den nan capacidad di respectivamente, Presidente y Presidente Suplemente di e Colegio di Supervision tabata presente na oficina di Minister Lampe, mientras cu Dr. Heutger a reuni den forma virtual.

Rector nobo pa Universidad pa Aruba Dr. Viola HeutgerDr. Viola Heutger anteriormente tabata afilia na Facultad di Derecho di Universidad di Antiya Hulandes (actualmente conoci como University of Curacao) como decano di e facultad. Dr. Heutger a obtene su doctorado na aña 1998 na Universidad de Salzburgo na Austria riba e tema di derecho laboral y descanso dominical. Como docente y profesor invita, Viola Heutger tabata afilia na universidadnan di Utrecht y di Maastricht. Tambe Heutger tabata afilia na Open Universiteit y Vrij Universiteit na Amsterdam, Anton de Kom Universiteit na Suriname y entre otro na e universidadnan di Viena, Palermo y Pisa. Como parti di e ‘Flying Faculty’, dr. Heutger a duna apoyo na e establicimento di  facultadnan di derecho na e universidad Turco-Aleman na Instanbul, Universidad di Hasselt na Belgica y Universidad Sigmund Freud na Viena, Austria. Dr. Heutger ta un hurista y a asesora a comisionnan legislativo na Surinam, Korsou, Kosovo y Polonia. Su experiencia den maneho y liderasgo a wordo obteni den su funcion como Decano di e Facultad di Derecho y como miembro di Hunta de Supervisión di e Mision di Marinero Aleman. Pa mesun organisacion aki dr. Heutger ta observado  di International Labour Organization na Ginebra. Den e periodo nos dilanti, Viola Heutger a keda di dedica na sostene procesonan di acreditacion cu ta salvaguardia e calidad di enseñansa. E ultimo añanan Universidad di Aruba, bao di liderasgo di dr. Glenn Thodé a inicia proyectonan importante, manera e progama SISSTEM, cu apoyo di Union Europeo. Dr. Heutger ta determina pa continua den e rumbo aki y sigui contribui na innovacion y internacionalisacion. Den e añanan nos dilanti Universidad di Aruba mester desaroya su mes den un centro de conocemento pa tur residente cu ta studia, na forma online, den exterior of na Aruba mes.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options