Reconocemento Trafficking in Persons (TIP) Report pa Jeanette Richardson-Baars (gearchiveerd)

Pa 2012, señora Jeanette Richardson-Baars di Cuerpo Policial di Aruba, tabata un di e dies personanan cu a ricibi e reconocemento for di Secretario di Estado señora Hillary Clinton.
E argumentacion pa reconoce Sra.Richardson ta entre otro cu bou di su guia, e Task Force di Aruba a logra aumenta e conscientisacion bou di e comunidad Arubano tocante traficacion di hende tanto pa trabou forsa como pa prostitucion.
Cu recursonan financiero limita, Sra. Richardson y su grupo di trabou a realisa un campaña di conscientisacion na april 2011. A adapta e leynan ariba e tereno di combati traficacion di hende p’asina por persigui tur esunnan responsabel.
E personanan cu ta bini na remarca pa e reconocemento di TIP heroes ta di organisacionnan no-gubernamental, funcionario di Polis, abogado y ciudadanonan preocupa cu mester pone un fin na sclavitud moderno.
E reconocemento ta pa nan esfuersonan incansabel pa proteha e victimanan, castiga esnan culpabel y aumenta e nivel di conscientisacion tocante actonan criminal den nan pais y rond mundo.
E otro personanan cu a ricibi un reconocemento ta procedente di Argentina, Australia, Cambodja, Republica di Congo, Grecia, Israel, Italia, Mauritania y Estados Unidos.
Jeanette Richardson-Baars a declara cu e premio ta resultado di e trabou grandi haci pa tur cu ta forma parti di e Task Force, comunidad en general y specialmente el a gradici ministro di Husticia Arthur Dowers cu a duna e grupo di trabou tur espacio pa traha pa combati traficacion di hende na Aruba.