Reconocemento na Carlos Bislip pa su aporte na e herencia cultural di Aruba

Oranjestad – Riba 14 di november 2020 a tuma luga un concierto dedica na Sr. Carlos Bislip pa conmemora su 40 aña dedica na musica.

Minister Xiomara Maduro ta entrega plakkaat na Carlos Bislip como reconocemento na pa su aporte na e herencia cultural di Aruba.Durante e concierto aki, Minister di Finansa, Asunto Economic y Cultura mr. Xiomara Maduro a sorpresa Carlos cu un reconocemento pa su guia y aporte positivo na e formacion musical di nos hobennan talentoso di Aruba.

Carera musical di Carlos
Carlos a descubri su pasion pa musica for di edad jong. Despues di a tuma les cerca tocadonan di drummer internacional cu tabata toca na nos hotelnan, ela dicidi cu e ta bay sigui studia musica na un di e miho universidadnan renombra di musica, cu ta Berklee College of Music na Boston. Carlos a termina su estudio na Berklee y a haya su diploma di Performance Major cu Drumset como instrument principal. Despues el a sigui prepara su mes profesionalmente y a obtene su Masters Degree den Arts Administration na Boston University. Na momento cu Carlos a regresa Aruba la bay traha dunando les na Arubaanse Muziekschool Rufo Wever.

Carlos BislipCarlos tin un carera musical impresionante, e ta motor y organisado di varios Concierto y Festival. Alabes e ta e organisado y presentado di UNESCO International Jazz Day Concert. Tambe ela funciona como Director Artistico y Musical di hopi orchestra pa eventonan importante manera celebracion di 25 aniversario di Status Aparte y na Concierto Bushiribana na honor di e bishita di nos Rey Willem Alexander y Reina Maxima. For di aña 1990 e ta organisa e ‘Serie di Concierto di Scol di Musica Rufo Wever’ locual e ta haciendo te awor y ta conoci tambe pa e ‘camp’nan di musica cu tur aña e ta organisa pa e hobenan. Carlos a comparti tarima cu masha hopi musico internacionalmente conoci, pa djis menciona algun, e vocalista di jazz sra. Adela Dalto, e trompetista di Jazz Tropical sr. Humberto Ramirez, e conocido timbalero Mariano Morales, e pianista di Jazz Tropical sr. Aloisio Aguiar y tambe e nominado y tambe e nominado na Grammy Award sr. Edsel Gomez.

Minister Maduro ta remarca cu e lista di e carera musical di Carlos ta hopi largo, pero locual mas ta sobresali den e lista aki ta su amor pa musica, e amor pa su trabou y e abilidad cu e tin pa siña, guia y motiva specialmente nos hobenan riba e tereno di musica.

Un Baluarte den Cultura
Na ocasion di e celebracion di 40 aña den musica Minister Maduro ta felicita y ta gradici Carlos pa e añanan cu ela dedica na e arte di musica. Ademas ta yama Carlos danki pa inspira, motiva, guia y contribui na e formacion musical di nos hobenan talentoso di nos Pais.Na nomber di Gobierno y pueblo di Aruba, Minister Maduro a entrega Carlos un plakaat di reconocemento pa su gran aporte na e herencia cultural di nos Pais.

Concierto dedica na sr. Carlos Bislip pa conmemora su 40 aña dedica na musica.   Carlos Bislip   Carlos Bislip

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options