Minister Xiomara Maduro a hiba palabra caminda ela yama bon bini special na nos musico- cantantenan y artistanan sr. Victor Camacho, sr. Hyacintho (Casin) Giel, sra. Gina Werleman, señora y representante di Sr. Felix (Chucho) Hoek, sr. Roland (Chicho) Kock, sr. Cesar Olarte y sr. Ivan Quandus. E mandatario a expresa palabra di felicitacion na cada musico riba nan dia. Dia internacional di Musica na honor di Santa Cecilia, patrona di musiconan.
Carera Musical impresionante
Minister Xiomara Maduro a dedica algun palabra na nos baluartenan musical, den orden alfabetico:
Victor Camacho
Sr. Victor Nicolas Camacho, ta pianista cu a representa Aruba den varios pais y tambe a toca deleitando nos bishitantenan di exterior den varios hotel local. Actualmente e ta solo pianist na Riu Palace Hotel. Sr. Camacho tambe a composita y aregla obranan pa Voz-I-Landia Escolar y a produci varios disco honrando sr. Rufo Wever y sr. Padu Lampe tur dos den feliz memoria. Victor tambe a toca hunto cu Savaneta Steelpan na Cas di Cultura na aña 1965 pa nos ex Reina Juliana y Prins Bernard tur dos den feliz memoria.
Hyacintho Giel
Sr. Hyacintho (Casin) Giel, como musico ta tocado di guitara y piano. Y como cantante, e ta cantante di ranchera y bolero. Casin a lanta su mesun banda ‘Cassenger Sweet Band’ y ta miembro y co-fundador di varios banda na Aruba manera Super Combo Casino y Triple S. Ademas di ta miembro y co-fundador, Casin ta compositor di mayoria di e cancionnan di Doble Sabor. Casin den temporada di carnaval tambe ta participa como compositor den Festival di Tumba. Casin Giel: pa semper Aruba su prome Rey di Tumba.
Felix Hoek
Sr. Felix (Chucho) Hoek, a wordo representa pa su sra. Gina Werleman. Chucho como musico a aregla y compone pa varios cantante y banda. Chucho ta conoci tambe pa aregla y compone jingle pa varios organisacion y compania. Chucho tabata integrante y a dirigi diferente banda musical y a acompaña varios banda den festival- y conciertonan. Chucho tabata docente di guitara clasico y electronico y baho. Tambe, ela duna les di teoria di harmonia, areglo y solfeo y ta actualmente e director di Stichting Arubaanse Muziekschool/Scol di Musica Rufo Wever.
Roland Kock
Sr. Roland Naricisio (Chicho) Kock, su carera musical ta como tocado den banda y steelband. Chicho ta toca varios instrumento manera baho, guitara, drum, conga y timbal. Un musico cu a toca den banda, na hotel y hasta den steelband. Ela toca cu hopi cantantenan renombra local y internacional. Tambe Chicho tabata toca baho y canta den coro di Sensacion del Caribe.
Cesar Olarte
Sr. Cesar Olarte ta bini di un generacion di famianan musical y a crece den ambiente di musica ranchera hunto cu e grupo Mariachi Perla de Aruba. For di edad hoben Cesar a domina genero di musica manera R&B urbano y a deleita publiconan local y internacional. Cesar a gana varios premio entre otro un Grammy Latino cu e produccion di Chichi Peralta y Son Familia.
Ivan Quandus
Sr. Ivan Quandus, tocado di guitara, steelpan y guitara bass. Ivan hunto cu sr. Carlos Bislip, sr. Delbert Bernabela ta forma parti di trio di jazz, the Aruba Art Ensemble. Ivan a toca tambe na diferente jazz festival local, den region y internacionalmente. Ivan a forma parti como basista di varios banda cu a duna presentacion den hotelnan local.
Minister di Cultura a menciona durante su discurso cu e carera musical di cada un di e 6 musiconan aki ta impresionante, locual a wordo treci dilanti ta djis un parti chikito di nan trayectoria musical.
Minister di Cultura a gradici cada un di e musiconan pa nan obranan maestral. Obranan cu a toca, inspira y a contribui na enrikece nos herencia cultural musical.
Tambe pa ta digno embahador di nos idioma Papiamento y pa expone nos cultura y promove nomber di nos Pais Aruba den exterior por medio di nan talento musical.
Share this page