Rapport final di investigacion nacional di droga: “Het drugsprobleem op Aruba bij de wortel aanpakken”

E rapport aki ta un investigacion nacional di e problematica di droga na Aruba, cu despues di 25 aña, ta haya un investigacion profundo.

E estudio nacional aki ta basa riba e adiccion di droga y alcohol, cu por afecta bida social y menasa e pilar principal di nos economia cu ta turismo. E meta di e investigacion aki, ta pa sondea con ta gara e problema aki na su raiz.  E raport final ta conta cu 171 pagina unda a haci 13 diferente ehercicio, pa asina obtene informacion den tur aspecto di e problematica aki. Un aspecto clave di e investigacion aki ta cu a percura pa busca informacion y cooperacion di varios di e departamentonan local cu tin di haber cu e tema di droga y alcohol.

Den e parti di datonan estadistico, Caribbean Reality Studies Center por a conta cu e sosten di Cuerpo Policial y Ministerio Publico. Pa por examina e rol di droga y alcohol den casonan di crisis cu a yega na instancianan manera Directie Voogdrijraad, Bureau Sostenemi, Fundacion Contra Violencia Relacional y Stichting Reclassering & Jeugdbescherming. Tambe a haya  informacion  di e organisacionnan di tratamento di adictonan manera; Adopt an Addict y Consultorio di Asuntonan di Adiccion. Finalmente, e centro a ricibi bon sosten di Adopt an Addict y Adult & Teen Challenge, cu a logra cumpli cu e tarea di laga adicto y ex-adictonan conta nan storia.

Minister di Husticia y Asuntonan Social Sr. Rocco Tjon, ta gradici Sr. Glenn Sankatsing y Director di Caribbean Reality Studies Center pa e investigacion aki, como tambe tur departamento pa nan cooperacion.