Publicacion masterplan ‘reposicionando e rumbo di nos pais’

ORANJESTAD – Riba 16 di november 2020, Gobierno di Aruba a publica e masterplan cu e titulo ‘Reposicionando e Rumbo di nos Pais’. Manera indica den comunicacionnan anterior a traha e masterplan danki na e esfuerso incansabel di mas di 125 profesional di sector publico como tambe sector priva, cu durante mas di 175 sesion a duna nan conocemento y experticio pa asina crea un plan pa un futuro resiliente pa Aruba. 

A identifica 5 proyecto acelerador cu ta cualifica pa drenta nan etapa di implementacion. Un ehempel di esaki ta e introduccion recien di e Alivio Fiscal II pa duna nos comercio y empresarionan un alivio y empuhe. Mas ainda e ekipo di reforma fiscal ta trahando y preparando e reforma pa asina sigui cu e pasonan necesario pa logra esaki e añanan nos dilanti.

Ad Masterplan Reposicionando e rumbo di nos país Relaciona cu e reforma di Ley Laboral, por indica cu e proceso di tripartite ta andando unda ta trata diferente tema di revision y modernisacion di nos leynan.  E ekipo di implementacion ta trahando riba un database cu ta bay duna un miho bista di nos mercado laboral pa asina por engrandece alineamento entre empleado y dunado di trabou.

E trayectonan di red-tape y innovacion den legislacion tambe ta andando unda cu un enfoke special riba revision di ordenansa di permiso pa haci esaki mas eficiente y pa asina acelera desaroyo economico sostenibel. Adicionalmente, ta trahando un mapa completo di e proceso legislativo pa asina indentifica e puntonan cu por agilisa y reforsa dicho proceso.

Pa locual ta trayecto di e-Government por indica cu e trabounan prepratorio pa por implementa e sistema (interoperability platform) pa por intercambia datonan den gobierno y facilita experencia di e ciudadano como tambe reforsa un forma di traha transparante, ta den su etapa final.

Tambe por indica cu e proyectonan acelerador ta estrechamente alinea cu e National Strategic Plan (NSP), unda cu e diferente grupo di trabou corespondiente a haci palabracionnan clave pa asina coordina esfuersonan pa logra e metanan di Nacionnan Uni, e asina yama metanan di desaroyo sostenibel (Sustainable Development Goals – SDGs).

Importante pa indica ta cu e version publica ta contene algun comentario, proposicion y critica constructivo ricibi di diferente actor activo riba diferente sector. Asina e grupo encarga cu revision y amplificacion di e plan a traha cu dedicacion pa por a registra tur comentario y proposicion y asina amplia e plan debidamente.

Ad Masterplan Reposicionando e rumbo di nos país Adicionalmente por indica cu ampliacion di e masterplan tambe e tuma luga pa medio di analisis y comparacion di e temanan presenta den e draft ‘Landspakket’ door di Gobierno Hulandes, pa asina promove coherencia y alineamento. No obstante cu ta trata e temanan den e masterplan den forma mas amplio y integral compara cu den e ‘Landspakket’, e metanan principal ta alinea y lo sigui alinea e accionnan den mas detaye hunto cu e ekiponan di implementacion.

Esaki ta apenas e prome etapa di ampliacion ya cu e masterplan lo keda evoluciona a base di consulta cu lo tuma luga cu partner di e diferente sector (e.o. sector priva). Sinembargo Gobierno di Aruba, pendiente di e siguiente etapa, ta comparti e plan cu comunidad di Aruba pa asina reforsa e proceso di inclusion. E plan ta obtenibel den forma innovativo y digital pa tur esnan interesa na:

http://www.repositioningoursails.com

Ta invita comunidad completo pa consulta e masterplan ‘Reposicionando e Rumbo di nos Pais’

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options