Proyecto Supernova di Fundacion Futura pa muchanan muhe entre 12 pa 15 aña.

E topico lo ta STEM cu ta encera: Ciencia, Tecnologia, Ingenieria y Matematica.

Durante ‘Immerse Innovation Week’  e siman di innovacion di Aruba, FUTURA, ta prepara un bunita proyecto cu yama Supernova y lo enfoca riba mucha muhe den innovacion. Globalmente, cuponan di trabou den STEM ta creciendo mas cu tur otro y e ta importante pa motiva muchanan muhe pa explora STEM. Actualmente e ramonan aki ta domina door di hende homber na Aruba. Pa e motibo aki nos mester stimula interes den mas muchanan muhe pa e materia aki.

Supernova ta un studio experimental pa mucha muhe, un evento estilo “pop-up” rond di Aruba. Mucha muhe di tur edad por bini hunto pa intercambia idea, colabora, inspira otro y siña habilidad nobo na diferente localidad rond di Aruba. Asina ta duna oportunidad na tur mucha muhe pa participa. E proyecto aki ta stimula igualdad di genero cu ta meta number 5 di e metanan di desaroyo sostenibel (SDGs).

Durante Supernova, e mucha muhe participando lo cera conoci cu e muhernan Arubianonan cu a studia y gradua den e ramo di STEM y haya sa mas di nan experiencia. Tambe tin e oportunidad pa haya sa mas tocante e materianan di STEM den un forma creativo durante e tayer.

E proyecto aki ta start durante Siman di Innovacion y lo sigui durante 2020. Futuro evento  di Supernova lo explora otro topiconan pa yuda desaroya mucha muhe pa ta pionero innovativo y yuda carga nos pais den futuro.

Prome Minister Evelyn Wever-Croes ta pidi mayornan cu tin yiunan muhe entre edad di 12 pa 15 aña, pa encurasha nan yiunan pa participa na e evento bunita aki cu por yuda nan dicidi nan futuro estudio of trabou.