Proyecto RWZI Parkietenbos pa agricultornan

E agricultornan ta depende di awa di dam, esta awa di yobida pa nan plantacion, pero e temporada di secura ta haci cu tur dam ta seco. Di otro banda e awa di WEB ta mucho caro pa uza pa agricultura. Den e cuadro ey Minister Otmar Oduber a cuminsa sondea diferente opcion y hunto cu Santa Rosa y DOW a cuminsa traha riba e proyecto na RWZI na Parkietenbos.
E awa cu lo filtra na Parkietenbos ta di bon calidad cu e por wordo uza pa tur tipo di mata y tambe pa plantacion di hooi pa cria di bestia. Esaki sigur ta un gran alivio pa e agricultornan.
E sistema ta uno sostenibel y ta garantisa un produccion di awa di calidad cu ta permiti pa durante henter aña por conta cu produccion di fruta y berdura.
Departamento di Agricultura, Cria y Pesca esta Santa Rosa ta e unico instancia cu por ricibi e awa aki gratis for di e RZWI na Parkietenbos y na su turno y lo ofrec’e na e agricultornan.
Instalacion di e UVfilternan ta sosode en cooperacion cu expertonan Hulandes cu pronto lo bini Aruba pa finalisa e trabounan.