Proyecto pa guia hobennan despues di scol

E proyecto ta bini di un necesidad grandi cu a constata den comunidad unda ambos mayor ta traha y e hobennan despues di scol ta keda cas sin supervision. Tambe a tene na cuenta e exito di e proyecto Traimerdia cu ta draai pa varios aña caba pa muchanan di scol basico. Lo cuminsa cu studiantenan di EPB y MAVO den ciclo basico. Na inicio e programa lo ta dirigi ariba e hobennan di 12 pa 13, un grupo hopi vunerabel den nos comunidad. Muchanan di 12 aña pariba ta den nan adolescencia, ta gusta experimenta y sin guia adecuado di un adulto nan por bay den un direccion robes. E programa total ta completamente dirigi ariba hobennan di 12 pa 18 aña di EPB, MAVO, HAVO y VWO. E programa lo ta consisti di diferente fase manera guia di huiswerk, yuda cu bijles y formacion general pa medio di actividad extra curicular manera deporte, arte, musica etc. Ta e intencion di Gobierno pa uza empleadonan publico pa e proyecto aki, pero nan lo mester haya formacion ariba tereno di pedagogia, asistencia social y psicologia di hoben. E actividadnan lo tuma luga mas tanto cu ta posibel na e propio scolnan secundario cu e muchanan ta atende. E proyecto ta conta cu sosten di Ministerio di Asuntonan General cu ta encarga entrega otro cu Innovacion y Desaroyo den bario y ministerio di Enseñansa. Tanto Prome Ministro mr. Mike Eman como ministro di Enseñansa Michelle Hooyboer-Winklaar a gradici e grupo di trabou cu a traha ariba e proyecto pa asina na september proximo e proyecto piloto por inicia.