Proyecto di palapa y gazebo na Mangel Halto ta cuminsa

Den e proyecto aki lo bay drecha, construi e palapanan y gazebonan na Mangel Halto.

Ya caba pa varios tempo esakinan ta den mal estado y tin cu a hasta wordo vandalisa. Ministerio di turismo conhuntamente cu Aruba Tourism Authority (ATA) a tuma nota di esaki y a dicidi di acerca Fundacion Parke Nacional Aruba (FPNA) cu Mangel Halto ta forma parti di dje. Den total lo bay construi 11 gazebo nobo y lo drecha 3 palapa.

Mangel Halto ta un area cu ta wordo hopi uza y frecuenta pa nos turistanan y nos localnan y pesey ta hopi importante nos drecha y mehora e area di naturalesa bunita aki. E proyecto aki lo bay cuminsa otro siman y dentro di poco nos lo tin tur e gazebonan nobo y e palapanan drecha. E proyecto aki a keda financia conhuntamente cu ATA y FPN.

FPNA como un fundacion independiente encarga cu e conservacion y maneho di areanan terestial y marino proteha na Aruba ta contento di por colabora cu ATA pa diseña palapanan y gazebonan cu ta tene naturalesa den consideracion pa asina trece balansa entre trabounan di conservacion y recreacion di localnan y bishitantenan.

Lama di Mangel Halto ta un area natural protehi cu ta conecta cu 'Marine Protected Area' (MPA) Mangel Halto Parke y ta sumamente importante pa proteha y conserva e area aki pa asina cumpli cu e ambicion di un turismo sostenibel cu lo beneficia Aruba su conservacion di naturalesa pa futuro generacionnan. – Fundacion Parke Nacional Aruba

Ministerio di Turismo ta traha segun su vision y maneho caminda ta enfoca mucho mas riba e turismo niche. Esaki nan ta e turistanan di “High Value, Low Volume”, e turistanan cu tin un entrada anual di mas di 150 mil dollar pa aña. Na momento cu  kier atrae e grupo di turismo niche aki, nan tin cierto espectativa, pesey ta importante pa sigui mehora e producto Aruba. Aruba ta conoci como un destinacion di calidad pa mantene e espectativa aki mester keda haci inversion.