Proyecto Bo Bario pa promove sentido comunitario (gearchiveerd)

E responsabilidad no ta encera solamente limpiesa, pero tambe e cooperacion pa haci actividadnan sano pa tanto hoben y adulto.
Durante luna di januari Prome Ministro Mike Eman y representantenan di e Oficina di Comunitarismo a bishita dos bario esta Calabas y Jan Flemming. A papia cu e habitantenan tocante nan preocupacionnan y nan deseonan relaciona cu desaroyo di nan bario. Sushedad y falta di sitio pa recreacion ta loke mas ta preocupa e habitantenan.
Tambe e habitantenan ta desea miho careteranan y mas luz di caya.
Den cada bario Gobierno lo percura pa elimina por ehempel autonan bieu cu no tin uzo y otro tipo di sushedad grandi, pero na mes momento ta indica e habitantenan cu nan tambe tin un responsabilidad pa yuda tene nan bario limpi. Un bario limpi por ta un motivacion pa e habitantenan nan mes organisa actividadnan cultural, social y deportivo y trece tur hende hunto.
Un cooperacion entre sector publico, sector priva y boluntarionan den cada bario ta yuda cu henter Aruba ta un isla limpi y agradabel pa biba segun Gobierno.
Gobierno ta tuma e prome paso pa haci cada bario limpi, pero ta desea pa e habitantenan ta consciente cu ta nan mes mester sigui cuida nan bario.