Pronto trabou por cuminsa riba RWZI nobo

E proyecto ta den un estado hopi avansa y ta premira cu trabounan di construccion lo por cuminsa den zomer.

E problema di e planta di RWZI na Bubali no ta algo nobo y e ta un problema mas grandi cu simpel holo desagradabel. E ta un peliger pa nos salud, naturalesa, turismo, nos economia y e calidad di bida di nos hendenan. Den e programa di Gobernacion pa 2021-2025 a pone como meta pa crea conscientisacion di e urgencia di e problematica aki y bin cu solucion sostenibel.

E planta na Bubali ta data di 1972 y e tempo ey e la wordo diseña pa sirbi un cierto cantidad di habitante. E tempo ey ta 60 mil hende ta biba na Aruba y 50 aña pasa ningun hende a pensa cu Aruba lo a conoce un desaroyo explosivo den cantidad di cambernan di hotel y cu esaki lo a haci cu e planta ta bira chikito pa capacidad di awa cu e mester procesa. Tambe tin un hospital grandi cu a drenta den funcion solamente algun aña despues di e planta di RWZI. Cu tempo e desaroyo economico di nos isla a bay laga desaroyo di infrastructura atras. E planta a bira chikito pa e volumen di desperdicio likido cu e mester procesa y su estado di mantencion a keda bai atras pa hopi aña pa motibo di falta di recurso financiero.

Durante e reunion cu e comision por a scucha for di e comision encarga cuanto trabou a haci den e ultimo añanan pa yega na un solucion structural pa tur esaki, y cu e proyecto awor a drenta den un etapa hopi avansa y e ta cla pa ehecuta.

E comision menciona a presenta na AHATA, ATSA, FPNA, DNM y tambe na gerencia di Amsterdam Manor e detayes di tur loke ta e plan, e trabounan cu a  haci caba, kico falta y den ki tempo ta pensa cu lo por keda cla. E comision ta lidera pa Sr. Jossy Figaroa, apunta pa Ministerio di Naturalesa, hunto cu Sr. Marlon Croes, director di DOW representando despacho di Minister President, y Sr. Ton Rojer di Utilities Aruba NV, cu ta parti di e carta di Ministerio di Energia.

Meta ta pa logra privatisa henter e sistema di desperdicio likido na Aruba. Pa medio di un entidad priva por sigura e inversion multi-miyonario cu ta necesario pa Aruba yega na un sistema moderno pa reemplasa e sistema chikito cu mientrastanto ta 50 aña bieu.

Gobierno ta preparando pa traspasa tur planta di RWZI y tambe tur sistema di rioolering pa e entidad nobo aki. Dentro di 18 pa 24 luna Aruba lo ta ehempel den Caribe cu un sistema completamente nobo y moderno riba e tereno di desperdicio likido.

Hunto cu e sistema nobo lo introduci tambe un ‘regulatory framework’. Esaki ta reglanan y normanan cu e planta y e sistema di rioolering mester cumpli cu’ne. Cu esaki lo por monitor cu tur cos ta bay conforme standardnan y evita cu e planta nobo ta cay atras den e servicio cu e mester duna comunidad.

Den programa di Gobernacion 2021-2025 tambe a indica cu lo busca un plan sostenibel pa conserva y integra e 5 saliña ‘wetlands’ den conexion cu RWZI-Bubali. Esaki awor ta parti integral di e  areglo cu e operador nobo. Nan lo tuma e responsabilidad pa tene e nivel adecuado di awa den e Western Wetlands, pa asina yuda fortalece y stimula nos flora y fauna den diferente oasis chikito na lugarnan cu awe ta saliñanan seco. Esaki na su turno lo yuda tambe diversifica nos producto turistico.