Prome vuelo electrico historico den Caribe - Inauguracion oficial di e evento “A Flight to the Future” di DCCA

ORANJESTAD - Dia 6 di november 2022 tabata un dia historico pa aviacion den region Caribe, cu e prome vuelo electrico realisa den Caribe Hulandes cu e Pipistrel Velis Electro di Royal NLR.

Cu e vuelo aki a inaugura oficialmente e prome evento internacional di transporte aereo “A Flight to the Future”, organisa pa Aruba Airport Authority N.V. (AAA) den nomber di Dutch Caribbean Cooperation of Airports (DCCA).

Minister di Transporte, Integridad, Naturalesa y Asuntonan di Adulto Mayor Ursell Arends, ta e prome pasahero den e Prome vuelo electrico historico den Caribe.Minister di Transporte, Integridad, Naturalesa y Asuntonan di Adulto Mayor Ursell Arends, tabatin e honor di ta e prome pasahero den e vuelo electrico aki. “Esaki ta historia den proceso! Pa ta e prome pasahero abordo di un vuelo electrico den region Caribe tabata un honor y alabes un emocion. Sostenibilidad y innovacion ta un parti importante di e vision cu gobierno tin pa futuro y pa por tin e vuelonan electrico aki realisa den region ta un testimonio mas di nos compromiso pa explora, desaroya y implementa esfuerso sostenibel.”

Minister di Transporte, Integridad, Naturalesa y Asuntonan di Adulto Mayor Ursell Arends, ta e prome pasahero den e Prome vuelo electrico historico den Caribe.Den presencia di varios mandatario invita for di seis isla den Caribe, invitado special di Hulanda, Merca, Canada, Latino America, Central America, Europa y varios ehecutivo di diferente aeropuerto di Caribe, e Pipistrel Velis Electro a lanta vuelo pa 17:30PM cu a dura 15 minuut. E Pipistrel Velis Electro a yega Aruba siman pasa y a asambl’e den hangar di Aeropuerto di Aruba mes p’asina por ehecuta e vuelonan electrico durante e siman di “A Flight to the Future”.

Dutch Caribbean Cooperation of Airports ta un cooperacion entre e seis aeropuertonan di Caribe denter di Reino Hulandes. DCCA tin como meta pa presenta diferente opcion di transporte aereo alternativo cu enfoke riba futuro, p’asina por mehora e conectividad interinsular entre e islanan di Caribe Hulandes haciendo esaki uno mas accesibel, eficiente y sostenibel. P’e motibo aki ta organisa e prome evento internacional di transporte aereo sostenibel “A Flight to the Future” cu ta tuma luga for di 7 pa 11 di november na Aruba.

Presidente Voorzitter Dutch Caribbean Cooperation of Airports (DCCA) Joost Meijs.“Servicio medico, mercado laboral, red social y e economia por beneficia di e conexionnan aereo mas accesibel y sostenibel”, segun presidente Joost Meijs den nomber di DCCA.

Royal NLR - Netherlands Aerospace Centre, lo participa den e evento. P’e ocasion aki, e avion di investigacion electrico NLR, e Pipistrel Velis Electro, lo realisa varios vuelo electrico. Ademas,e vuelo di 6 di november tawata e prome vuelo di un avion electrico den Caribe. Pipistrel Velis Electro ta un 2-seater propeller training aircraft cu ta completamente “powered” pa un electromotor cu por bula pa 30 minuut, tumando en cuanto un 30 minuut di tempo di reserva. Lo demostra e avion di investigacion electrico di NLR tambe den e hangaar na aeropuerto pa e communidad di nos isla. NLR ta kere cu ta crucial pa involucra un y tur den e biahe pa un futuro di aviacion sostenibel.

Durante henter e siman di e evento, lo tin diferente discurso y lo haci varios presentacion, alabes lo realisa diferente panel di discusion, lo provee varios masterclass y lo realisa algun demostracion diario di vuelo electronico cu Pipistrel Velis Electro na nos aeropuerto.E conocemento comparti durante e siman di e evento lo ta diferente tur dia. E temanan clave lo ta:

  • “Discover the Undiscovered”, enfocando riba aviacion sostenibel;
  • “Built for Experience”, enfocando riba turismo sostenibel;
  • “Pushing the limits: changing the Future”, enfocando riba operacionnan na aeropuerto sostenibel;
  • “Reality Check”, enfocando riba investigashonnan andando y inversionnan;
  • “Connecting Generations”, dunando e comunidad un oportunidad pa experiencia e Pipistrel Velis Electro di cerca.

Ainda tin posibilidad pa registra y atende e evento aki di manera virtual cu lo ta transmiti “live” a traves di www.dccaairports.com/live di 7 pa 11 di november 2022. Pa mas informacion tocante e evento y pa por registra participacion virtual, por bishita e website www.dccaairports.com

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options