Prome Minister ta reuni cu ombudsman di Hulanda

Regularmente señor van Zutphen ta bin Aruba pa papia riba diferente tema cu ta di importancia pa un ombudsman.

Aruba no tin un ombudsman ainda pero ta casi na final di e proceso pa Aruba tambe haya su ombudsman. Ya Aruba tin e ley di ombudsman. Tambe Gobierno a purba di ancr’e den constitucion pero esey no a logra prome cu cambio di Gobierno. Aworaki ta spera cu Parlamento por finalisa e tratamento di e ley pa asina por ancra e ley di ombudsman den nos constitucion.

Si logra esaki, Aruba lo tin un ombudsman ancra den consitucion cual ta algo hopi importante. Si no logra ancr’e den constitucion lo sigui cu e ley toch y lo busca un ombudsman y e ora e por cuminsa haci su trabou. Ta bira tempo pa Aruba cu ta e unico pais den reino cu no tin su ombudsman, pa haya un.

Un ombudsman ta un defensor di pueblo. E ta un instituto caminda cu ciudadanonan por yega cu pregunta y cu keho riba con nan a wordo trata, riba cosnan cu nan ta sinti cu no ta bay bon. Claro semper e ciudadano por bay corte pa busca su derecho pero caminda e no por bay corte, e por yega na e ombudsman cu ta e defensor di pueblo cu lo scuche y haci un investigacion y duna Gobierno conseho riba e caso specifico of un grupo di casonan similar.

“Desde mi presupuesto nos ta presupuesta e sumanan pa bin cu e ombudsman, kiermen esey ta regla pero e ombudsman ta un instituto cu ta bira independiente, los di politiek, e no ta cay bou di Gobierno. Parlamento ta esun encarga pa bin cu e ley, haci e reclutamento y seleccion pa nos haya nos ombudsman y asina nos tin nos instituto. Ohala cu pronto nos ta asina leu, Prome Minister a duna di conoce.