Prome minister ta felicita pueblo di Honduras cu nan prome presidente femenino Xiomara Castro

Locual ta haci e ocasion asina special ta cu ta e prome biaha cu ta elegi un Presidente femenino na Honduras. Premier Wever - Croes cu tambe ta Aruba su prome Prome Minister feminino desde 2017, a representa Reino Hulandes na e acto di instalacion.

Durante di un entrevista na Honduras cu canal 11 di Honduras, Prome Minister Wever - Croes a splica cu ora cu a ricibi e invitacion no a duda ningun momento pa compaña Presidente Xiomara Castro na e ocasion. Ya ambos lider tabata conoce otro caba desde algun aña atras.

Prome Minster Wever - Croes a sigui splica cu pa Aruba e ta sumamente importante pa amplia e lasonan cu tin cu Honduras. “Actualmente ta den periodo di recuperacion di Covid y ta importante pa busca  inversionistanan y esnan interesa pa yuda reconstrui e pais.

Algo cu a siña di Covid ta pa tin aliansa y traha hunto”.

Sosten na lidernan femenino

Pa locual ta lasonan cu otro lidernan femenino, Prome Minister a remarca cu liderazgo masculino ta hopi mas comun cu esun femenino, p’esey Prome Minister ta considera hopi importante pa sostene otro.

“Unabes tin empresa y/of organisacionnan cu hende muhe den posicion di liderazgo, e ser femenino ta trece algo diferente na mesa, mas comprension, empatia y sentimento. Esaki ta importante den momentonan manera awo cu varios pais mundialmente ta den proceso di recuperacion di Covid. P’esey mi tambe ta brinda mi sosten na e prome Presidente femenino di Honduras,’ Premier Wever - Croes a bisa.

Por ultimo Prome Minister a expresa di ta sumamente gradici pa e oportunidad, e hospitalidad y tur bon trato ricibi na Honduras. Den nomber di Gobierno di Aruba y pueblo di Aruba en general, Prome Minsiter ta felicita e pueblo di Honduras cu nan Presidente nobo y ta spera cu e pueblo por brinda Presidente Castro tur sosten pa realisa locual ta necesario pa e pais, concentrando riba bienestar pa un y tur.