Minister Hoekstra di Hulanda lo ta na Corsou y hunto cu e Premiernan di Aruba, Corsou y Sint Maarten lo atende diferente tema relaciona cu asuntonan exterior.
KOBB ta tuma luga un biaha pa aña y cada pais den Reino ta haya e oportunidad pa trece nan vision, preocupacion y cada pais ta haya turno pa organis’e y a toca Corsou pa organis’e e aña aki.
E tema principal riba agenda cu lo trata extensamente ta e situacion geopolitico di Venezuela en bista di e crisis migratorio cu tin. Aruba ta un di e paisnan cu ta mas seriamente afecta pa e exodo di hopi persona cu ta di Venezuela. Otro tema cu lo trata ta e eventual reapertura di e frontera y Prome Minister lo expresa su preocupacion riba ambos tema.
Diaranson 26 di october, Minister Hoekstra lo ta na Aruba pa reuni cu Prome Minister, Minister Glenbert Croes y Minister Rocco Tjon. E tema di Venezuela lo trata un biaha mas y tambe e aspectonan di siguridad. Lo trata tambe e peticion di Minister Glenbert Croes pa intermedia na OFAC pa Aruba por cumpra crudo hopi mas barata for di Venezuela.
E reunionnan tanto na Corsou como na Aruba lo ta hopi intenso y lo enfoca riba e cooperacion multilateral entre e paisnan den Reino.
Share this page