Prome Minister hunto cu secretario di estado Knops a bishita Fundacion contra Violencia Relacional

ORANJESTAD - E siman aki Secretario di Estado Raymond Knops ta na Aruba pa un bishita di dos dia.

Despues di un reunion cu Prome Minister Evelyn Wever - Croes, Sr. Knops a bishita Fundacion Contra Violencia Relacional (e fundacion aki antes tabata yama Fundacion pa Hende Muhenan den Dificultad).

E motibo tras di e bishita aki ta, pasobra 1 aña y mey pasa ora cu a bira conoci cu Hulanda ta dispuesto pa pone fondo disponibel pa combati e crisis di Venezuela, a propone pa e fundacion haya parti di e fondo pa por expande e shelter cu tin, pa por yuda esnan cu ta wordo abusa (violencia domestico). Un di e motibonan ta, cu a mira aumento den cifranan desde e crisis di Venezuela, sea ta nos propio localnan cu ta aplica abuso riba hende muhe Venezolano of pareha Venezolano cu a bin Aruba door di e situacion dificil, cu tambe tabata cay victima di violencia relacional. Pues a propone e proyecto aki y hunto cu Cede Aruba y Gobierno Hulandes a bay di acuerdo pa inverti pa por a expande e shelter.

Bishita Secretario di Estado Raymond y Prome Minister Evelyn Wever - Croes, Sr. Knops na Fundacion Contra Violencia Relacional (e fundacion aki antes tabata yama Fundacion pa Hende Muhenan den Dificultad).

Segun tratadonan internacional, pa cada 10 mil persona cu ta biba den un Pais, bo mester di 1 camber/ shelter pa dado caso algo sosode. Aworaki Aruba ta cumpli cu e rekisito aki y hasta mas amplio cu esey. Esaki ta danki na e proyecto aki, financia door di Gobierno di Hulanda hunto cu Cede Aruba y momento cu a bira conoci cu Gobierno Hulandes ta bay inverti den ampliacion, tabatin mas partners local cu tambe a inverti.

Prome Minister ta duna pabien na e directiva di e fundacion pa e trabou enorme cu nan ta haciendo como tambe na e directora nobo.

‘Esaki ta un facilidad cu niun Pais ta desea di tin, pero e ta un realidad.  Especialmente aworaki den crisis e ta un realidad cu no por sconde, pesey ta contento cu por tin e facilidadnan aki. Mester bisa cu Secretario di Estado Raymond Knops tabata hopi contento tambe pa mira tur e trabou cu a wordo haci cu e fondonan cu a wordo poni disponibel door di Hulanda’, Prome Minister a termina bisando

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options