Prome Minister Evelyn Wever-Croes a representa Aruba y Reino na e traspaso presidencial aki. President Cortizo ta di e partido PRD, un social democrata, cu tin como punto central combatimento di pobresa y desigualidad social.
Ademas Prome Minister Wever-Croes a hiba combersacion cu e Minister nobo di Asunto Exterior Sr. Alejandro Ferrer como tambe cu e vice presidente di Panama Sr. José Gabriel Carrizo.
Relacion Aruba, Reino y Panama
Tin un laso estrecho entre Aruba, Corsou, Reino y Panama, pero por traha riba mas area. Hulanda tin un par di proyecto ambicioso andando na Panama. Pa loke ta trata Aruba por haci hopi mas tocante turismo, specialmente turismo crucero. Panama, Aruba y Corsou ta situa na e parti sur di e ruta Caribense, y actualmente tin plan pa introduci otro linea di crucero riba e ruta aki.
President Cortizo a gradici Prome Minister Wever-Croes pa su presencia y pa e cooperacion entre e paisnan. Prome Minister Wever-Croes tabata riba e podium hunto cu Rey Felipe di Spaña, President di Colombia, Republica Dominicana, Peru, Honduras, Guatemala, Bolivia, Republica Arabe Saharaui y e premier di Marokko. Ademas tabata presente delegadonan di 90 país.
Crisis Venezuela y oportunidadnan economico
E crisis na Venezuela, como tambe e oportunidadnan economico tabata topico di combersacion ente Prome Minister di Aruba y e Presidente Duque di Colombia. Prome Minister di Aruba a duna un splicacion amplio di e maneho economico nobo di Gabinete Wever-Croes y Presidente Duque a invita Prome Minister pa atende un mision comercial na Colombia.
Prome Minister tambe a combersa cu e Rey di Spaña tocante e crisis na Venezuela y con paisnan Europeo por yuda. Prome Minister a enfatisa atrobe cu e crisis no ta solamente un crisis Venezolano, como tampoco un crisis regional, pero un crisis mundial.
Share this page