Meta di e reunion tabata ta pa conoce miho e retonan cu e oficina di Ombudsman ta enfrenta na Corsou, pa Aruba asina ta miho prepara, mirando cu pronto Aruba tambe lo introduci e instituto Ombudsman.
Ya caba e procedura ta andando pa Ombudsman pronto bira un realidad na nos pais tambe. Gobierno a apunta señora Sahayra Kelly como ‘kwartiermaker’ di Ombudsman kende ya caba a cuminsa planifica e oficina aki.
Aruba ta e unico pais den Reino cu no tin un Ombudsman. Un Ombudsman ta un defensor di pueblo. Caminda cu un ciudadano ta sinti cu un departamento di Gobierno no trat’e na un forma adecuado, e por acudi na un Ombudsman kende lo studia e caso y duna conseho na Gobierno con pa actua. Si e ciudadano ta sinti cu no a cumpli cu su derechonan, of ta trapa riba su derecho den e proceso di pidi permiso, tereno, restitucion di Impuesto, ta algun caso valido cu un ciudadano por acudi na un Ombudsman. Prome Minister ta un promotor tras di e ley aki pa bin cu e Ombudsman. Pronto e ley di Ombudsman ta bay Parlamento. Ya caba tin fondonan den presupuesto pa e gastonan di e Oficina di Ombudsman.
Despues cu e ley pasa, lo habri solicitudnan di Ombudsman, Kinder-Ombudsman y demas funcionnan cu e oficina ta rekeri. Lo yena e posicionnan aki primeramente door di hendenan cu ya ta trahando den Gobierno caba mirando cu tin un ‘personeelstop’ na vigor. Oficina di Ombudsman ta bay ta un instituto totalmente independiente di Gobierno pa garantisa miho servicio pa atende cu e derechonan di e ciudadanonan.
Share this page