A firma eMoU prome pa Citgo na Merca y awor a yega Aruba pa firm’e aki tambe.
Riba 9 di october 2019, Gobierno di Aruba a informa cu a logra yega na un acuerdo cu e refineria pa Aruba por haya e yabi di e refineria y e terminal for di Citgo.
Esaki ta pa permiti Gobierno di Aruba busca otronan cu ta interesa den opera e terminal, e waf y e refineria tambe. Mes momento ta garantisa derecho di e trahadonan di e compania.
REFINERIA
Cu firmamento di e MoU, Gobierno di Aruba por cuminsa negocia cu otro partidonan interesa. Ya caba tin un lista di mas di 25 compania cu a expresa nan interes den ultimo tempo, sinembargo Gobierno no por a negocia cu nan, pa haya sa si nan ta partnernan serio. Awor si esaki ta posibel. Gobierno lo no limita su mes na e lista di compania aki so. Gobierno lo bay busca activamente pa mas inversionista, entre otro door di tene un road show na Houston, caminda tin inversionistanan serio, pa lanta nan interes pa inverti na Aruba.
Lo formalisa e comision encarga cu negosacion dentro di poco. Riba peticion di sindicato, lo envolvi trahado tambe den e proceso aki.
Gobierno ta buscando un partner serio, cu:
- tin e fondo pa inverti mesora den e refinería;
- cu ta haci’e un refineria ‘state of the art’;
- cu ta cumpli cu standardnan medioambiental;
- cu ta paga su fair share na caha di gobierno;
- cu ta trata su empleadonan bon.
TERMINAL Y WAF
Cu e firmamento di e MoU, Gobierno ta haya control di e waf y di e tankinan. Apesar cu e tankinan nan falta hopi mantencion, nan tin un balor hopi halto. Gobierno di Aruba ta bay percura pa e negoshi aki bira uno hopi exitoso cu ta genera hopi entrada pa Gobierno, y cu lo crea hopi cupo di trabou.
EMPLEADONAN
E punto di salida di Gobierno ta cu tur empleado mester keda cu nan trabou, en todo caso mas tanto empleado posibel, bou di e operador nobo. Citgo a indica anteriormente cu den caso cu e operador nobo no tuma e empleadonan over y Citgo mester paga nan tur nan aña di servicio, cu nan no tin placa pa paga esey. Sinembargo, Gobierno a pone como condicion mas importante pa Citgo cu nan mester paga tur loke nan debe na trahadonan, contratistanan y otronan cu nan debe. Premier Evelyn Wever-Croes a indica cu e empleadonan ta importante pa gobierno y nan interesnan mester bin na prome luga.
Share this page