Mirando e vulnerabilidad di e islanan chikito pa cambio climatologico y efecto negativo experencia, Aruba y Hulanda a mira e necesidad pa promove cooperacion den accion climatologico entre e islanan chikito mundialmente, organisando e prome conferencia dirigi riba e tema aki na Aruba.
E vision di Gobierno ta pa transiciona pa energia renobabel.
Awor nos ta na 17% energia renobabel, pa 2024 nos mester yega na 35%, y na 2050 nos mester yega 50%. Asina Aruba ta contribui na limita calentamento global cu 1.5 grado Celsius.
Riba invitacion di Prome Minister, Evelyn Wever-Croes y Minister di Clima y Energia di Hulanda, Rob Jetten, representante di islanan di region Caribe, islanan estado den Pacifico, partidonan relevante, organisacionnan di Nacionnan Uni, institutonan di conocemento y institucionnan financiero lo reuni durante e conferencia aki.
PROGRAMA:
1. Reino Hulandes
Riba e prome dia lo enfoca riba transicion di clima y energia den Reino Hulandes y lo discuti riba puntonan necesario, den termino di cooperacion, pa logra e obhetivo climatologico di Paris 2050 y lo conta cu participacion di Aruba, Corsou, Boneiro, Saba, Sint Maarten, Sint Eustatius y Hulanda. Riba e prome dia Aruba y Hulanda lo firma un acuerdo di cooperacion, den cual Hulanda lo asisti Aruba den yega na fondo pa por cumpli cu e transicion di energia fosil, pa energia renobabel.
2. Internacional
E di dos dia di conferencia lo consisti di un orientacion internacional. Despues di esaki, un panel amplio di diferente pais y organisacion lo discuti e accion climatologico cu ta necesario pa tur isla di mundo. E meta principal ta pa comparti best practices, y crea mas conscientisacion riba ki tipo di accion climatico tin riba e islanan y con efectivo e cooperacion entre e islanan por ta.
Paisnan cu a confirma caba ta Spaña, Mexico, Marshall islands, Greneda, Surinam, Panama, Belize, Sint Maarten, St. Eustatius, Saba, Corsou y Boneiro.
3. Aruba
E ultimo dia lo enfoca riba e desaroyo y esfuerso na Aruba pa loke ta e transicion di energia y clima. Lo tin varios presentacion riba e desaroyonan andando y oportunidad pa combersa tocante unda Aruba ta para awo y na unda Aruba lo bay den ramo di transicion climatologico y energia den futuro. Aruba lo showcase entre otro proyectonan di Eagle LNG, Windpark y HydrogenValley.
Durante e dianan aki, e particpantenan lo bishita diferente proyecto di clima y energia na Aruba.
Pa mas informacion por tuma contacto cu CCEC via e siguiente email:info@ccec23.com of ccec@minezk.nl of subi e website oficial www.ccec23.com.
Share this page