Proceso di cita di asilo

ORANJESTAD - DIMAS a tuma nota di un reportahe dialuna 7 di juni 2021 den un medio di comunicacion tocante un malcomprondemento di e proceso di cita na momento cu un hende ta pidi proteccion internacional (e.o asilo) na Aruba.

Ta asina cu un persona cu a haci un peticion pa cita of cu ta bin pa un entrevista tocate un peticion di asilo ta wordo atendi personalmente. Ta importante pa reitera cu na momento cu un hende indica cu e tin mester di proteccion, cu su relato  personal lo wordo scucha.

Pa cu esaki mester tene cuenta cu e siguiente puntonan di e proceso manera e ta aplicabel na Aruba:

  • Edificio DimasUn persona cu ta pidi asilo of cu ta bin pa un entrevista referente su asilo ta wordo scucha en persona.
  • E persona ta wordo invita pa bin DIMAS cu anticipacion pa e por prepara pa su entrevista y trece tur loke e ta kere ta necesario pa cu esaki. Tene na cuenta cu e invitacion ta bin via di e correo electronico cu a wordo suminstra. Ta importante pa e correo suministra ta di e persona en cuestion mes y cu e correo suministra ta wordo controla regularmente.
  • E persona cu cita so lo wordo permiti pa atende e cita y drenta e edificio di DIMAS. No ta permiti pa tin otro personan presente durante di e cita na DIMAS.
  • Tur cita ta wordo conduci den e idioma di escogencia di e persona y tur documento presenta ta den e idioma di escogencia di e persona tambe. Cualkier documento cu ta wordo firma ta semper den e idioma di escogencia di e persona.
  • Personanan cu no atende nan cita sin un motibo valido, lo wordo considera di no ta interesa mas den nan peticion cu consecuencia cu e peticion por wordo termina prematuramente.
  • Na momento cu un hende no por presenta na un cita, mester informa esaki por lo menos 48 ora adelanta y mester presenta motibo valido pa cu esaki. Si no tin motibo valido y e persona no presenta na su cita esaki ta wordo considera como un falta di interes pa su peticion cu e mesun consecuencia previamente menciona.
  • Ta reitera cu e procesonan di proteccion (asilo) ta procesonan voluntario, si un personan ta desea di tin representacion legal e por haci esaki riba su propio gastonan y pafor di e horario di su cita na DIMAS. Durante di e cita na DIMAS ta e cliente so lo wordo scucha.

Despues di e proceso di registracion y demas citanan, e proceso lo continua y e persona en cuestion lo ricibi un contesta mas liher cu ta posibel. Den algun caso e ta necesario pa haci citanan adicional prome cu un decision por wordo tuma. Na momento cu un decision positivo wordo tuma e persona en cuestion lo ricibi su estadia corespondiente. Den caso cu e decision tuma ta uno negativo, e persona en cuestion lo por ricibi hunto cu su negacion un periodo pa bandona Aruba. 

Mester menciona cu un persona cu no ta di acuerdo cu su decision ricibi semper tin e posibilidad di entrega un obhecion y entama di e manera aki un proceso legal si e ta desea esaki.

Tene na cuenta cu e medidanan di COVID-19 ta keda aplicable durante di e bishita na DIMAS, pues tapaboca ta keda obligatorio.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options