Presupuesto 2020 a pasa cu mayoria absoluto

Dit item is gearchiveerd op 26-04-2020.

ORANJESTAD – Diamars, 24 di maart 2020, Parlamento di Aruba a aproba e presupuesto di crisis pa aña 2020.

Cu e presupuesto aproba, gobierno por subi mercado internacional y busca fondo pa asina yuda esnan cu ta mas afecta pe e crisis di Coronavirus.

Minister di Finansa a splica diamars e pasonan cu Gobierno ta tumando pa por atende cu e crisis aki:

  1. Prome paso cu a tuma desde 13 di maart cu Aruba a conoce su prome dos casonan di COVID-19 ta pa calcula e impacto financiero pa pais Aruba. A haci e scenarionan of calculacionnan conhuntamente cu Banco Central, informacion di S&P y di IMF.
  2. E di dos paso ta pa busca fondo necesario urgente pa stabilisa e sistema pa asina como pais nos por sigui draai AZV, SVB y Gobierno.Riba 24 di maart, 2020, Parlamento a aproba e presupuesto. Awor Gobierno mester pidi aprobacion na Conseho di Minister di Reino pa despues bay busca fondo riba e mercado internacional.
  3. Unabes cu haci esaki, ta bay pa paso 3 cual ta baha e gastonan di gobernacion y adapta esaki, pasobra e efectonan di e virus ta algo cu lo dura hopi aña pa nos por sali for di dje.

Presupuesto 2020 ta inclui un pakete cu Gobierno a introduci pa trece alivio temporario riba tres tereno:

  1. E desempleadonan, pues personanan cu ta perde trabou a consecuencia di e crisis economico. Den e grupo aki ta bay  inverti AWG. 214 miyon.
  2. negoshinan chikito y mediano cu tin menos di 50 trahado. Den e grupo aki ta bay inverti AWG. 40 miyon.
  3. pa cubri e deficit adicional di e sistema di siguridad social di AZV y SVB cu AWG 429 miyon cu nos ta calcula cu nan ta bay haya menos. Hunto e suma ta yega na AWG. 683 miyon.

Prome Minister Evelyn Wever-Croes ta indica cu no ta esaki so ta e necesidad financiero di Gobierno, pasobra den e presupuesto a para e reforma fiscal cu lo a trece AWG. 103 myon aden. Awor gobierno mester busca e placa ey di otro caminda. Tambe nos economia ta bay contrae, ta bay bira mas chikito e aña aki debi na e Coronavirus y p’esey mester bay presta placa pa cubri loke e economia no lo bay genera.

Tambe door di e companianan y e pagadonan di impuesto tal bes no por bay cumpli cu nan pagonan di impuesto, Gobierno ta tene cuenta tambe cu un AWG. 250 miyon menos. Pues tur esaki ta pone cu si bo conta nan hunto, Aruba tin un necesidad financiero pa bay presta di AWG. 1.3 biyon.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options