Prestacion di hotelnan den januari 2023 ta surpasa expectativa

E cifranan aki ta ilustra e crecemento den turismo cu a tuma luga den e prome luna di aña 2023.

Manera ta conoci, e maneho di gobierno ta dirgi riba turistanan di calidad y turistanan cu ta gana mas di 150 mil dollar pa aña, turistanan cu ta laga hopi placa atras den nos economia.

Den luna di januari 2023 e grado di ocupacion a subi cu 72.1% porciento compara cu januari 2022. Esaki ta un porcentahe di 72.1% mas hopi cu e aña anterior, cual ta un porcentahe halto y e mandatario ta splica cu esaki ta refleha e crecemento continuo di turismo na Aruba.

Banda di e grado di ocupacion e (Revenue Per Available Room - REV PAR) den luna di januari 2023 a conoce un crecemento di 102.9%. REV PAR den januari 2023 tabata $349.26 cu ta un cifra hopi halto. E REV PAR ta un indicador sumamente importante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais.

Minister di Turismo y Salud Publico sr. Dangui Oduber ta sumamente contento y satisfecho cu e resultadonan di luna di januari 2023 y ta gradici tur empleado y tur partner den sector turistico pa cu e resultado bunita aki.