Durante Censo 2020, un team di aproximadamente 1200 persona (tellers) cu lo ta encarga cu e tarea di colecta informacion riba topiconan manera vivienda, salud, educacion y labor, lo bishita tur hogar na Aruba. Un Censo ta un instrumento valioso pa henter Aruba. Instancianan publico, institutonan priva, scolnan y personanan individual por haci bon uzo di e informacion colecta pa formula maneho, haci planificacion y tambe pa keda al tanto di desaroyonan importante pa loke ta trata poblacion di Aruba.
Pa garantisa cu e Censo 2020 lo ta un exito, CBS ta depende di henter e pueblo di Aruba y tambe di tellers cu lo asisti den e coleccion di datonan cerca tur hogar na Aruba. E ta hopi importante pa esnan cu fungi como teller ta personanan confiabel y capacita pa haci e tarea importante cu nan tin nan dilanti durante di Censo 2020 na e mihor manera posibel.
Pa CBS por selecciona e personanan cu lo forma parti di e team di tellers pa Censo 2020, desde dialuna 3 di juni tin un formulario di inscripcion disponibel pa aplica pa teller durante di Censo 2020.
Formulario di inscripcion
Censo 2020 lo bay ta completamente digital y pa e motibo aki CBS a scoge pa haci e inscripcion tambe completamente digital. Esnan interesa pa fungi como tellers durante di Censo 2020 por acudi na e website di CBS www.cbs.aw y yena e formulario di inscripcion online. Via un link http://cbs.aw/wp/index.php/2019/06/03/apply-to-be-an-interviewer-census-2020/ na banda drechi di e homepagedi e website por haya acceso na e formulario di inscripcion.
E rekisitonan mas importante pa esnan cu ta desea di aplica:
- Nan mester tin e edad minimo di 18 aña;
- un educacion minimo di MAVO;
- Por traha cu un tablet;
- disponibilidad pa traha full time durante di e periodo di Censo 2020.
CBS tambe lo organisa un conteo di prueba durante e prome siman di october 2019 pa haci un chekeo general di tur e procedura cu lo uza durante di Censo 2020. Pa e conteo di prueba aki, CBS lo mester di 75 tellers. Esnan interesa pa contribui na e conteo di prueba aki tambe por haci uzo di e formulario di inscripcion online.
Pa mas informacion por tuma contacto libremente cu CBS durante orario di oficina na number di telefon: 583-7433 of via e-mail na: census2020@cbs.aw
Share this page