Un pelicula cu ta hiba nos bek den tempo, na aña 1942 pa ser exacto y ta conta nos un poco di kico a pasa e tempo ey durante Segunda Guera Mundial na Aruba.
Basa riba hecho real, ‘Blackout’ ta enfoca riba e importancia cu Aruba tabata tin e tempo di Segunda Guera Mundial unda e refineria Lago y Arend tabata obheto di atake di e Alemannan pa motibo cu nan tabata e refinerianan mas grandi na mundo cu tabata yuda e aliadonan cu producto petrolero.
‘Blackout’ ta un pelicula dirigi pa Angel Soto, skirbi pa Ephrayim Odor, Angel Soto y Jurjen Abma cu actuacion estelar di Angel Soto mes hunto cu un elenco grandi di artista local manera Arnalda Lampe, Ephrayim Odor y Francis Toussaint.
Minister di Cultura Xiomara Maduro, cu tabata presente na e premiere di ‘Blackout’, ta felicita Angel Soto, e elenco completo y tur esnan cu a haci e pelicula posibel, specialmente UNOCA y Prins Bernhard Cultuurfonds pa nan contribucion.
Alabes, ta invita pueblo di Aruba pa mira e pelicula aki pa haya sa mas di kico a pasa na Aruba durante Segunda Guera Mundial.
Share this page