Plasa Tino Ruiz: un realidad!

Na e ocasion aki, invitadonan a bin hunto na warda di Polis di Noord pa rindi honor na agente policial Tino Ruiz den feliz memoria y su famia.

Tino Ruiz a drenta School di Polis Watty Vos na 2009 y a gradua na 2013. Tino a traha como brigadier na post di Noord y tabata un polis ehemplar, servicial, dedica na su trabao y tabata haci su trabao cu pasion y empatia.

E trabao di polis ta trece un peso enorme cune, y hopi bes nos no ta realisa e impacto grandi cu e trabao aki tin riba e agentenan policial y nan famia. Un agente policial ta mas cu un persona den uniform. Nan ta tata, mama, ruman y yiu y tur dia ta pone nan bida na peliger y haci sacrificio grandi pa sirbi y proteha nos comunidad.

Cada bes cu un agente policial subi warda, nan y nan famia tin un deseo; esey ta pa nan regresa cas sano y salvo na final di e warda. 3 di juli 2017 famia, coleganan di KPA y comunidad completo a keda sacudi cu e noticia tragico cu Tino Ruiz, a paga e prijs maximo "in the line of duty" y cu Tino lo no regresa cas despues di su warda. Esaki tabata un shock grandi specialmente pa Cuerpo Policial cu nunca a perde un colega na pia di trabao.

Cu e plasa aki kier duna Cuerpo Policial su balor den comunidad y conscientisa comunidad riba e trabao dificil y peligroso di un agente policial. Ademas Plasa Tino Ruiz ta fungi como simbolo pa cultiva hermandad den Cuerpo Policial.