E proyecto di bari pa reciclahe na nos beachnan ta bay contribui na eleva e producto Aruba.
Semper Ministerio di Turismo hunto cu Tourism Product Enhancement Funds (TPEF) a percura pa tin bari na nos beachnan.
TPEF tabata esun cu inicialmente a explora e proyecto aki y tambe tabata considera otro alternativanan den e maneho di desperdicio cu lo contribui na un turismo sostenibel.
Lamentablemente den 2020 TPEF no por a sigui cubri e proyectonan aki pa motibo di falta di fondo. Na e momento ey tabata tin 100 bari rond di nos beachnan. Aki ta unda Aruba Tourism Authority (ATA) a cay aden y duna un man.
Den e cuadro di e desaroyo di nos producto turistico awor Aruba tin 22 bari di sushi cu ta diseña pa facilita e proceso di reciclahe.
Na 2021 cu a sondia diferente opcion pa asina wak con por pone e bari sushi nan bek, teniendo na cuenta cu tur e rekisito nan existente, pero tambe e rekisitonan nobo, manera recicla aluminium, staal y plastic. Tambe lo recicla botternan di compania nan local.
E bari sushi aki ta nobo y ta den e colornan di bandera di Aruba. Diferente compania rond Aruba lo patronisa e barinan di sushi. Logo di e patronisado lo aparece riba e bari.
Ta hopi importante pa tira bo sushi den un bari ora bo ta na un di nos beachnan y no banda dje pa evita cu esaki por drenta den e lama cu tur e consecuencia cu esaki por tin pa e bida marino.
Turismo ta e motor di nos economia y ta pesey nos mester inverti den dje y na mes momento cuid’e.
Share this page