Pal’i Sia Cora kita di tereno na Sabana Basora tawata protegi pa ley

Dit item is gearchiveerd op 25-08-2019.

ORANJESTAD - Algun siman atras a drenta un yamada, di un miembro activo di un organisacion ambiental, pa entrega un keho oficial relaciona cu rosamento di un tereno na Sabana Basora. E  tereno en cuestion, ta situa banda di e Santana na Sabana Basora.

Mientras cu e caso mes tin cu cana su proceso di investigacion prome cu Directie  Natuur en Milieu (DNM) por elabora extensivamente ariba dje, nos kier a trece dilanti cu e mata aki, e Pal’I Sia Cora (Bursera simaruba), ta protegi segun e Decreto Nacional Proteccion di Flora y Fauna local (Landsbesluit bescherming inheemse flora en fauna).

Pal’i Sia (Bursera simaruba)Director di DNM a menciona den transcurso di siman pasa durante un entrevista cu DNM  conoce solamente 2 di e matanan aki. Cu otro palabra, ta dos luga so tin unda e Pal’i Sia ta ubica. Awor cu a kita uno, kibrando ley, lo mester warda pa wak kico por ta e solucion pa esaki of kico lo por ta e consecuencia di e acto castigabel aki.  

DNM no solamente kier trece dilanti cu e flora ta protehi, pero tambe cu pa otorgamento di tereno di mas cu 750m2 tin un proceso legal y cu DNM tin un rol na inicio cu ta di inventarisa y duna conseho ariba e proceso di otorgamento di tereno y condicionnan.   

Pal’i Sia (Bursera simaruba)E Pal’i Sia Cora ta un mata masha schaars na Aruba y DNM kier a haci un yamada na comunidad pa yuda nos haya sa unda por tin mas di e Pal’i Sia Cora, den cura na cas of den mondi. DNM tin un website www.midinosmatanan.com cu ta e plataforma pa comunidad yuda pa informa unda e matanan ta ubica. Na inicio di e proyecto di midi nos matanan, DNM a haci e yamada pa midi e matanan cu troncon grandi, pa nan tambe por bin na remarke pa proteccion den futuro. Nos ta haci yamada na pueblo pa haci uzo di e plataforma aki pa yuda localisa tambe e matanan Pal’i Sia Cora. Si bo persona ta reconoce e mata aki, manera den e potret, sea bo tin e den cura of sa di un cunucu unda tin un, por saca su potret y pon’e riba e plataforma. Nos ta pidi solamente pa su ubicacion, kiermen si bo no ta dispone di un meetlat of meetlint, toch nos ta pidi un potret di e mata y su localidad. Tur informacion ta keda confidencial.

DNM ta gradici comunidad pa e esfuerso pa nos por localisa tur e matanan di Pal’i Sia Cora y e matanan cu troncon grandi rond Aruba, asina por proteha nan mas efectivamente.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options