Pa luna di december 2020 Aruba a recupera 43% di nos turismo stayovers

ORANJESTAD - Luna di december 2020 tawata e miho luna pa Aruba su turismo desde cu nos a habri nos frontera bek na juli 2020.

E tawata un aña sumamente dificil pa Aruba, nos turismo y nos economia. No obstante tur obstaculonan y tur e retonan e aña aki pa nos turismo, Pais Aruba a percura pa implementa e protocolnan pa habri nos frontera bek. 

Ta considera Aruba un trendsetter den e manera cu a maneha COVID-19 y e forma con nos a habri nos fronteranan na juli 2020.

Aruba tambe a:

  • introduci un PCR test mandatorio desde juli. Awe ta wak cu hopi pais ta haciendo mesun cos 7 luna despues di nos;
  • introduci un seguro obligatorio cu a duna e resultado desea. 
  • a introduci e Aruba health app cu turista y local por download pa ricibi resultado di nan PCR test dentro di 6 ora di tempo. 

Y awor nos ta e promer pais na mundo cu a join e common pass network. 

Esaki ta un partnership cu e aerolineanan di mas grandi, como tambe cu e world economic forum pa tin un sistema digitalisa pa verificacion di PCR test y tambe vacuna.

Ministerio di turismo conhuntamente cu ATA, AAA y AHATA a bin ta trahando duro riba recuperacion di nos turismo. Den luna di december a anuncia un vuelo directo cu Jetblue for di La Guardia, New York. Un vuelo importante pa Aruba cu sigur lo duna su frutonan. Den pleno pandemia Jetblue a demostra un confiansa den habri un ruta nobo pa Aruba. Nos a mira tambe un otro vuelo directo esun di TUI for di London cu lamentablemente a para debi na e lockdown na Inglaterra.

Aruba a habri su fronteranan bek na juli 2020 y nos por mira e ultimo lunanan cu gradualmente nos turismo ta creciendo. E luna di september 2020 a mira un caida pero pa loke ta e resto di lunanan tin crecemento. Oficina di turismo a sali for di 2 scenario pa loke ta trata nos recuperacion, cu ta e scenario optimista y e escenario conservativo. A cera e aña yegando cerca di e scenario conservativo. Obviamente e pandemia y e situacion na otro paisnan tin su consecuencia riba turismo.

Aki por mira e ultimo lunanan con nos turismo a crece gradualmente:

Luna Cantidad  stayover
Juli 2020 12,921
Aug 2020 17,420
Sep 2020 14,697
oktober 2020 21,882
Nov 2020 29,714
Dec 2020 42,936

Minister di Turismo Dangui Oduber ta satisfecho cu gradualmente nos turismo ta recuperando. Naturalmente e deseo lo tawata pa ta mas cerca di e scenario optimista, pero esaki no ta e caso. E situacion na Merca y na Europa ta keda uno preocupante y obviamente esaki tin su repercusion pa nos turismo. Di otro banda ta convenci cu aña 2021 lo ta un mihor aña pa Aruba y nos turismo considerando cu e vacuna ya caba ta riba mercado y dentro di poco na Aruba tambe. Cu e yegada di e vacuna ta e comienso pa nos por recupera nos turismo y economia.  

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options