Oxybenzone ta mata nos coralnan y caba cu e biodiversidad marino

E kimico aki ta un componente di producto pa proteccion contra rayonan di solo.e asina yama productonan antisolar of sunscreens.

Oxybenzone ta forma parti di e proyecto di ley ‘Choose Zero. E proyecto aki tin como meta pa motiva pueblo pa no uza productonan cu ta contene e kimico oxybenzone.

Den un articulo anterior tocante prohibicion di plastic di un solo uzo, DNM a informa pueblo tocante e kimico den producto antisolar.  E motibo cu kier conscientisa pueblo tocante di oxybenzone ta pasobra ora e kimico aki drenta den nos lama e ta haci daño na nos coralnan y bida marino. E proyecto di ley ta encera prohibicion di importacion, benta, distribucion, y entrega gratis di productonan di plastic di un solo uzo y productonan cu ta contene oxybenzone.

Ta uza oxybenzone den plastic pa filtra e rayonan UV (ultra-violeto) y tambe pa stabiliza y fungi como proteccion di rayonan UV solar pa preveni reaccion kimico den e producto antisolar. No solamente ta haya e kimico den productonan antisolar, pero tambe den hairspray, cosmetica y pintura di huña.

Ta berdad cu oxybenzone ta yuda preveni kemadura ora un persona ta expone su mes na hopi solo, pero mester evita e daño cu e ta haci na nos coralnan. Ademas e ta causa imbalance hormonal den hende.

Pa tuma e precaucionan necesario, por lesa e lista di ingrediente riba e producto pa averigua si oxybenzone ta forma parti di e ingredientenan. Por scoge pa proteccion alternativo manera, evita solo entre 10’or di mainta y 3’or di atardi, bisti paña di catuna di manga largo cu ta cubri suficiente cuero, uza un sombre y productonan cu no ta contene e kimico aki.

Segun investigacion scientifico internacional riba coralnan, e raport ta conclui cu e kimico oxybenzone tin consecuencianan dañino pa coralnan, y hasta ta mata nan. E kimico ta yega den lama of riu, lago, rooi y plasnan di awa door di tanto hende local como turista. Asina cu e presencia di e kimico ta excesivo, e ta ataca e funcionamento ecologico di e coralnan y afecta e biodiversidad marino. Ta comproba cu unda tin mas actividad y concentracion di hende cu ta uza productonan antisolar cu oxybenzone, ta clasifica e estado di e coralnan como uno di preocupacion y risico ambiental halto.

Un biaha mas, proyectonan di ley manera esun aki tin un meta preventivo. E ta yuda pa tene nos naturalesa y medio ambiente den un estado saludabel pa nos mes y futuro generacion. DNM ta boga pa un calidad di bida mas halto sin uzo di productonan di plastic di un solo uzo y productonan cu ta contene oxybenzone.