Opleiding mbo-3 kinderopvang a inicia

Minister Rocco Tjon a duna di conoce cu esaki ta un dia hopi importante pa e mundo di kinderopvang, of manera ta mihor conoci na Aruba “Creche”. 

A anuncia cu lo cuminsa cu di e opleiding aki na final di e sessionnan e Codigo di Proteccion den november 2021, unda oficialmente a duna di conoce cu e opleiding MBO niveau 3 pa kinderopvang lo bira un realidad y alaves acredita door di Directie Onderwijs.

Tur e leidsternan di e crechenan a haya e materia aki, pa asina por implementa esaki den nan trabounan diario. Desde 1 di april 2021 Codigo di Proteccion a drenta na vigor y ta un di e proyectonan central y principal di Sociaal Crisis Plan.

E realisacion di e opleiding ta danki na e Sociaal Crisis Plan (SCP). E participantenan mes a indica di kier participa den e curso aki, algo cu a determina por medio di un encuesta cu a haci. Esnan cu ta participa den e opleiding aki, tambe ta haci e pago necesario pa por participa.

Gobierno a aloca fondo pa parcialmente cubri e gastonan di e curso, pa e participantenan. E inversionnan aki ta importante pa proteha y guia nos muchanan mas mihor ainda.