Nicole Hoevertsz di Aruba a bira Vice Presidente di Comite Olimpico Internacional, IOC

ORANJESTAD – Riba diamars 20 di juli 2021, Secretario General di Comite Olimpico Arubano, Sra. Nicole Hoevertsz a keda eligi como e vice-presidente di e organo mas halto di e deporte mundial cu ta Comite Olimpico Internacional.

“Si bo a puntrami algun aña pasa si mi tin pensa di bira vice-presidente di IOC, mi lo a bisabo no, paso esey lo ta un soño cu nunca lo bira realidad pa motibo cu mi ta bin di un isla chikito. Pero danki na mi coleganan den IOC e soño aki a bira un realidad”, Nicole a bisa den su prome palabranan durante e Asamblea General di IOC na Tokyo, Japon.

Nicole Hoevertsz di Aruba a bira Vice Presidente di Comite Olimpico Internacional, IOC.Segun Nicole ta sigui conta cu nos ta bini di un isla chikito y nos deporte no ta conoci ainda, no sobresali mundialmente y den e mundo Olimpico nos no a gana un medaya Olimpico ainda. Pesey mes tambe pa yega na un puesto asina halto den e IOC ta algo grandi.

“Mi ta bin di un isla chikito, mi ta hende muher y den un principio nunca mi tabata tin e ambicion pa bira vice-presidente di IOC. Mi ta un hende cu gusta deporte y traha pa deporte pero nunca cu un meta mi dilanti cu un dia mi lo kier bira vice-presidente di IOC. Pero dado momento bo ta desaroya bo mes di un pa e otro y siña mas y mas. Den IOC nan ta encurasha bo crece y bay padilanti den bo funcion, bo responsabilidadnan ta bira cada bez mas grandi, bo ta tareanan ta bira mas pisa”.

Nicole Hoevertsz di Aruba a bira Vice Presidente di Comite Olimpico Internacional, IOC.Ya for di algun aña caba, Nicole mester a drenta como miembro ehecutivo di IOC, pero debi na su trabou na Aruba e no por a combina esaki te ora cu e oportunidad a presenta. Y ora esaki a presenta y riba insistencia di actual Presidente di IOC, sr. Thomas Bach, Nicole a tuma e decision cu e ta pone su mes disponibel pa bira un miembro ehecutivo di IOC, y esey a pasa 4 aña pasa na 2017. E aña aki e propio Bach a propone na Nicole pa e postula su mes pa vice-presidente, cual e no tabata tin den mente. Nicole den prome instante tabata duda si e lo ta cla pa e funcion asina importante. Despues di e evalua Nicole a dicidi di postula su mes mirando tambe cu no tin un hende muher actualmente cu e titulo ey. Mester bisa cu na final di e eleccion, Nicole Hoevertsz a haya 72 voto na fabor y 7 voto en contra.

Nicole a haya masha hopi felicitacion di Hulanda, entre otro Rey Willem Alexander cu a manda Nicole un mail felicitando su persona pa cu su funcion nobo.

Prome Minister Evelyn Wever-Croes, den nomber di Gobierno di Aruba y pueblo di Aruba en general, tambe a  felicita Nicole pa e logro grandi aki y alabes ta gradici Nicole pa un biaha mas pone e nomber di Aruba na halto internacionalmente. Curacao Sport and Olympic Federation tambe a felicita Nicole.

Y sigur tambe di e continente di America, coleganan di Panam Sports, ODESUR y ODECABE, tur tabata super contento y e apoyo tabata inmenso na su persona.

 Fuente: Facebook  comiteolimpicoarubano/

                Facebook Gabinete Wever-Croes

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options