E informacion ta consisti di un poco di construccion y historia di e Monumento y con importante e ta pa conserva.
Lo elabora tocante di e monumento di “Stadhuis ( Eloy Arends)”, situa na Whilhelminastraat 8 y ta conoci como cas di dokter Jacobo Eloy Maria Arends. E ta e prome Monumento cu Monumentenbureau hunto cu Gobierno di Aruba a restaura na 1997. E estilo di arkitectura Arubano-Caribense diseña door di sr. Medardo ‘Dada’ Picus. E tereno aki ta 1.545 m² y ta un mansion tipico Arubano. Literalmente por yama e cas “un cas habri”, pasobra e tabatin muraya nan falso cu tabata permiti cu facilmente por a conecta e espacionan cu otro.
E entrada di cas tin porta grandi cu kolomnan cu ta wanta e piso di balcon di e parti ariba. Y entre e balconnan nos por mira detaye di decoracion traha di palo. E detaye aki ta e cortina di palo meimei di e kolomnan yama “gingerbread”. E triangulo riba e kolomnan yama un “tempaan”. Na e parti ariba di e porta- y bentannan nos por observa e glasnan di color.
Tambe nos por mira cu no a construi e cas na nivel di e tereno, pero tin un elevacion di mas o menos 1.50 meter. A eleva e cas di shon (herenhuis) aki pasobra bou di e vloernan di palo tabatin espacio pa warda varios cos.
Tambe ta eleva vloernan di palo for di tera pa nan por haya ventilacion. Tambe tin bentana pa claridad por drenta.
E parti pafo na e dak nos por mira e ‘dakkapelnan’ y coronanan. Ariba e rand di muraya y fachada nos por aprecia e diferente decoracionnan.
Un edificio cu detayenan masha bunita cu ta resalta den su beyesa y transforma den un historia di amor.Tradicion Arubano di bon famia ta dicta cu prome cu un homber casa, e mester presenta su futuro esposa cu un cas nobo traha y completamente muebla. Y asina a sosode tambe.
Durante compromiso entre Eloy Arends y Monica Laclé (yiu di Adriaan Lacle di cual a nombra un caminda a na su nomber cu ta “Adriaan Laclé Boulevard”) na aña 1922 a cuminsa cu e construccion, cu a termina na 1925, ora cu nan a casa.
Actualmente oficina di Registro Civil, Censo ta ubica den e edificio y ceremonia di matrimonio civil ta tuma luga den e salanan representativo.
Monumentenbureau ta sigui contrubui, educa y conta historia di nos Monumentonan cu tin balornan importante pa nos pais Aruba.
Share this page