Ministernan, parlamentarionan y empleadonan publico tambe mester haci sacrificio

Dit item is gearchiveerd op 25-04-2020.

ORANJESTAD - Prome Minister a informa Parlamento cu e necesidad financiero pa por bringa e efectonan di e crisis aki ta enorme y consecuentemente Gobierno di Aruba mester bay presta 1300 miyon florin. 

Sinembargo, Prome Minister a indica, e placa aki no ta suficiente y ta bay rekeri sacrificio di sector publico. Ya ta bisto cu sector priva ta sacrificando. Miles di mama y tata di famia ta perdiendo trabou. Varios compania no lo wanta e sla aki nan y keda opera. Kiermen sector priva ta haciendo di su parti y aworaki Gobierno ta bay traha riba e parti di sector publico.

Minister di Finanasa a duna un splicacion amplio di e manera con Gobierno ta atendiendo cu e crisis aki. Esaki ta bay den 3 fase:

  1. E prome fase ta cu hunto cu profesionalnan, institucionnan manera Banco Central, Central Bureau Statistiek y Directie Economische Zaken, asisti pa IMF y S&P, a yega na calculacion di e impacto aki cu ta encera e suma di Awg 1300 miyon.
  2. Fase 2 ta pa busca e fondonan pa asina stabilisa e fondonan di AZV y SVB y tambe pa percura cu Gobierno tin fondo pa por sigui funciona. Parlamento a aproba esaki diamars 24 di maart. Gobierno di Aruba awor por cuminsa busca e fondonan aki. Una bes cu tin e fondonan aki y cuminsa yuda esnan afecta, Gobierno lo bay pa fase 3.
  3. Fase 3 kiermen baha gasto di Gobierno. Corta drasticamente den gastonan di Gobierno y ahusta e patronchi di gasto na e realidad nobo. Den e caso aki Gobierno mester ahusta den e presupuesto tambe di acuerdo cu e situacion nobo.

Den esaki, Prome Minister a enfatisa cu si kier bay sigui funciona como Gobierno, Minister, Parlamentario y e empleadonan publico mester bay entrega parti di nan salario y beneficionnan. Pasobra Gobierno no ta bay tin placa pa por paga tur e gastonan. Esnan cu ta interesa pa sigui traha den servicio di Gobierno lo tin cu entrega pa por keda cu e trabou. 

Realidad di crisis ta cu nos tur mester bay sacrifica. Prome Minister a indica cu ainda no sa e cantidad cu mester sacrifica, pasobra mester calcula esey ainda. Pero awor aki e urgencia ta pa yega na e fondonan pa stabilisa fondo di AZV y SVB pa asina Gobierno por funciona y yuda esnan cu mas mester aworaki door di e crisis.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options