Minister Xiomara Maduro a ricibi bishita di dos hoben emprendedor di koffie ‘Kompa Nanzi’

Durante e encuentro aki e dos hobennan aki a presenta Minister Maduro nan producto di koffie ‘Kompa Nanzi’ traha localmente. David Jr. y Daniel na edad hoben a establece un compania di koffie ‘Kompa Nanzi’  cu ta procesa y produci koffie localmente. E bonchinan di koffie ta 100% arabica, certifica organico, artesenalmente tosta y empaketa localmente. E nomber di e koffie ‘Kompa Nanzi’ ta pa simbolisa cu e koffie ta un producto crioyo.

‘Kompa Nanzi’ ta un koffie cu no tin mester di agrega suco na dje y ta bunita empaketa. Riba e paki tin e figuranan di e historia di Kompa Nanzi y tambe un historia cortico tocante Kompa Nanzi. Pronto e koffie ‘Kompa Nanzi’ lo ta obtenibel rond Aruba.

Minister Xiomara Maduro a expresa di ta masha orguyoso di e dos hobennan emprendedor David Jr. y Daniel, cu ta un bon ehempel y inspiracion pa otro hobennan y ta desea e David Jr. y Daniel hopi exito cu nan compañía local ‘Kompa Nanzi’.