Esey ta rekeri un otro forma di atende cu e cuido, segun minister di Salubridad Publico, dr. Richard Visser. Mas y mas hende grandi ta scoge pa keda biba na cas, den circulo familiar, pero e cuido pa nan ta exigi un otro acercamento. Instancianan manera Wit Gele Kruis y dokternan di cas, fisioterapistanan mester ta prepara pa atende cu esaki segun e mandatario.
“Biehes tin su retonan social, psicologico y riba tereno di salud; un hende grandi no ta mes activo cu persona hoben, su forma di come ta cambia, su mobilidad ta limita y ta sufri di diferente malesa cronico y pues ta bira mas vulnerabel pa nos cuido medico”.
Na ocasion di cuarenta aña di existencia di SABA, e instancia cu ta encarga cu cuido di hende den un cas pa anciano, minister Visser a expresa cu e infrastructura di cuido, e conocemento specifico pa cuido di un hende grandi, e accesibilidad y otro factornan merece tur atencion pa duna un cuido di nivel halto.
E mandatario su meta ta pa e hende grandi keda mas tanto cu ta posibel na cas, den circulo familiar pero di otro banda e ta consciente cu esaki tin consecuencia pa e infrastructura total di cuido. Cu otro palabra kier trece e cuido cerca e grandinan enbes cu nan ta sali bay busca cuido of ayudo.
Minister Visser a aplaudi e iniciativa di SABA pa organisa un congreso dedica na cuido di hende grandi pa discuti e diferente topiconan pa por haya un miho bista con cada hende por participa den un miho cuido di hende di edad avansa.
Share this page