Un desaroyo sostenibel ta aspira pa crecemento economico den harmonia cu calidad di bida di nos hendenan y proteccion di nos naturalesa. Como Minister encarga cu Desaroyo Sostenibel y realisacion di Metanan di Desaroyo Sostenibel (SDG’s) di e Agenda 2030 di Nacionnan Uni, Minister Wever ta enfatisa e importancia di igualdad di genero y reduccion di desigualdad. Esaki ta conta specificamente pa meta 10.2 pa empodera y promove inclusion social, economico y politico di tur, a pesar di edad, sexo, desabilidad, rasa, etnicidad, origen, religion, estado economico of otro estado y e principio di no laga ningun hende atras (leave no one behind). Den e vision di maneho di Minister Wever a pone atencion specifico na e tema di reduccion di desigualdad.
Derechonan humano manera e derecho riba igualdad ta stipula den nos Constitucion y den tratadonan internacional, manera e Convencion Europeo di Derechonan Humano (EVRM). EVRM ta proteha tambe e derecho riba un bida familiar (‘family life’) no obstante e preferencia sexual.
Na aña 2015 Corte Europeo pa Derechonan Humano a stipula cu den caso cu un pais no ta brinda oportunidad pa parehanan di mesun sexo drenta enlace matrimonial, e pais tin e obligacion pa brinda e personanan aki un alternativa pa por registra nan relacion pa medio di un forma di un union civil, cu lo mester brindanan por lo menos e derechonan basico (‘core rights’) pa proteha nan relacion. Pais Aruba a cumpli cu e obligacion aki pa medio di nos Codigo Civil cu a drenta na vigor na luna di september aña pasa. Desde e tempo ey ta posibel pa parehanan di e mesun y di diferente sexo efectua un union civil (‘geregistreerd partnerschap’).
Sinembargo tin cambionan legal cu mester tuma lugar ainda pa por papia di igualdad completo entre parehanan cu a efectua un union civil y parehanan casa na Aruba. E hecho cu a regla solamente e ‘core rights’ ta significa cu e derechonan cu un matrimonio ta ofrece na parehanan casa riba por ehempel tereno fiscal, di pensioen, di herencia pero tambe di relacionnan di famia, no ta conta pa parehanan cu a efectua un union civil.
Pa reduci e desigualdad aki y pa promove e inclusion di diferente (grupo di) personanan den sociedad, ta importante pa regula e posicion huridico di parehanan den un union civil mas tanto cu ta posibel di e mesun forma cu esun di e parehanan casa. Despues di a regla pues e ‘core rights’ pa parehanan cu tin un union civil, ta toca turno pa regla e consecuencianan legal di esaki den forma di derechonan complementario (‘supplementary rights’). Pa por haci esaki Minister Wever a pidi Conseho di Minister pa aproba pa haci un inventarisacion di e cambionan di nos Codigo Civil cu mester tuma lugar pa reduci desigualdad na Aruba, cual peticion a keda aproba den mei 2022.
“Como Minister encarga cu Desaroyo Sostenibel mi ta kere den igualdad pa tur ciudadano di Aruba y cu niun hende mag keda atras. Como Pais nos mester percura pa nos cumpli cu tratadonan internacional y garantisa derechonan humano” – Minister Geoffrey Wever a declara.
Share this page