Minister di Finansa a presenta e Nota di Cambio di Fin di Aña 2022 na Parlamento

ORANJESTAD - Durante un conferencia di Prensa di Gobierno di Aruba, Minister di Finansa y Cultura Sra. Xiomara Maduro a presenta e Nota di Fin di Aña (Najaarsnota) 2022 cu ta contene e cambionan proponi pa Presupuesto 2022.

Conforme e ciclo presupuestario, prome cu fin di e aña  Gobierno ta presenta un cambio di presupuesto pa asina haya aprobacion di Parlamento pa e cambionan cu ta presenta durante e aña den gasto y entrada. E aña aki Gobierno a acelera e proceso presupuestario aki teniendo cuenta cu e ultimo conseho di CAFT y e menasa pa Aruba haya un instruccion di Conseho di Minister di Reino.

Ta baha e deficit pa haci menos debe

E mandatario a splica cu gobierno a haci diferente ehercicio pa por baha e deficit cu e meta pa fia menos y traha menos debe pa Pais Aruba. Cu e cambionan presenta e deficit lo baha di 227 miyon pa 148 miyon florin  di nos GDP.

Nota di Cambio di Fin di Aña 2022Entrada ta subi cu 47.1 miyon florin

Cu e cambionan presenta, e entradanan den Presupuesto 2022 ta subi cu 47.1 miyon florin. Den e Nota di Fin di Aña 2022  tin specificacion di e cambionan den entrada cu ta trata di, entre otro, impuesto dividendo, Landspakket, subsidio di salario y deviezenprovisie.

Gasto ta baha cu 16.6 miyon florin

E gastonan, entre otro, gasto di Personal y di Servicio y Producto ta baha  den Presupuesto 2022 lo baha cu 16.6 miyon florin.

Lo reduci e deficit cu 79.3 miyon florin

Den e  Presupuesto 2022 aproba pa Parlamento di Aruba, e deficit tabata 227 miyon florin   Cu e cambio proponi lo baha e deficit cu 79.3 miyon y e deficit lo bira 148 miyon florin.  

E Ley pa haci Cambio den Presupuesto 2022 ta cana su caminda pa Parlamento

E Ley pa haci Cambio den Presupuesto 2022 awo ta cana su caminda pa por yega na Parlamento. Awo e concepto di Ley ta pa bay CAFT y Raad van Advies pa conseho. Asina cu ricibi e consehonan, Gobierno di Aruba lo atende cunan y despues lo presenta e Ley pa haci Cambio den Presupuesto 2022 na Parlamento pa su tratamento.

Mas informacion por haya den e documento adhunto:

  • Resumen Nota di fin di aña presupuesto 2022.
Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options